३२ अभियांत्रिकी महाविद्यालयांवर प्रवेशबंदी?

राष्ट्रसंत तुकडोजी महाराज नागपूर विद्यापीठाशी संलग्नित ३२ अभियांत्रिकी महाविद्यालयांवर प्रवेशबंदीचे संकट निर्माण झाले आहे.

नियमांची पूर्तता नाही : काही अभ्यासक्रमांंबाबत विद्वत् परिषदेची ‘डीटीई’कडे शिफारसनागपूर : राष्ट्रसंत तुकडोजी महाराज नागपूर विद्यापीठाशी संलग्नित ३२ अभियांत्रिकी महाविद्यालयांवर प्रवेशबंदीचे संकट निर्माण झाले आहे. या महाविद्यालयांनी ‘एआयसीटीई’च्या (आॅल इंडिया कौन्सिल फॉर टेक्निकल एज्युकेशन) निर्देशांचे पालन केलेले नाही. त्यामुळे नागपूर विद्यापीठाच्या विद्वत् परिषदेने या महाविद्यालयांतील संबंधित अभ्यासक्रमांत विद्यार्थ्यांना प्रवेश देण्यात येऊ नयेत, असा प्रस्ताव संमत केला असून यासंदर्भात ‘डीटीई’कडे (डायरेक्टोरेट आॅफ टेक्निकल एज्युकेशन) शिफारस केली आहे.नागपूर विभागांतर्गत ५७ अभियांत्रिकी महाविद्यालये येतात. यापैकी बहुतांश महाविद्यालये नागपूर विद्यापीठाशी संलग्नित आहेत. अनेक महाविद्यालयांमध्ये आवश्यक त्या सुविधाच उपलब्ध नाहीत. शिवाय नियमित प्राध्यापकांचीदेखील वानवा आहे. याबद्दल ‘एआयसीटीई’ व ‘डीटीई’कडे वारंवार तक्रारीदेखील करण्यात आल्या. त्यामुळे पुढील शैक्षणिक सत्राची प्रवेशप्रक्रिया सुरू होण्याअगोदरच या महाविद्यालयांची तपासणी करण्याचा निर्णय ‘एआयसीटीई’ने घेतला व ‘डीटीई’ला याबाबत सूचना केली.