सुमेध वाघमारे
नागपूर : कोरोनाचा वेग कमालीचा वाढला आहे. मागील १२ दिवसांपासून दैनंदिन कोरोनाबाधितांच्या संख्येत हजाराने भर पडत आहे. या आजाराच्या रुग्णांसाठी मेडिकलमध्ये राखीव ठेवण्यात आलेल्या ३२६ खाटांपेैकी १५६ खाटा फुल्ल झाल्या आहेत. यातील १२० खाटांच्या अतिदक्षता विभागात (आयसीयू) आग प्रतिबंधक यंत्रणाच नसल्याने दीड महिन्यापासून बंद आहे. सध्या कोरोनाच्या रुग्णांसाठी ५२ खाटा शिल्लक असून आयसीयूचे रुग्ण वाढल्यास त्यांना ठेवणार कुठे, हा प्रश्न आहे.
शासकीय वैद्यकीय महाविद्यालय व रुग्णालयात (मेडिकल) केवळ मेडिसीन विभागाचे अतिदक्षता विभाग होते. तत्कालिन अधिष्ठाता डॉ. अभिमन्यू निसवाडे यांनी पंतप्रधान आरोग्य सुरक्षेच्या योजनेच्या निधीतून शल्यचिकित्सा विभाग, औषधवैद्यशास्त्र विभाग व बालरोग विभागासाठी स्वतंत्र आयसीयू इमारतीचे बांधकाम हाती घेतले. मार्च २०१८ मध्ये बांधकाम पूर्ण झाले. परंतु येथील वैद्यकीय उपकरणे खरेदीसाठी दोन वर्षे वाट पहावी लागली. १२० खाटांचे हे आयसीयू रुग्णसेवेत सुरू होणार तोच मार्च २०२० पासून कोरोनाचा प्रादुर्भाव सुरू झाला. ट्रॉमा केअर सेंटरला कोविड डेडिकेटेड हॉस्पिटलमध्ये रुपांतरीत करण्यात आले. नोव्हेंबरमध्ये कोरोनाचे रुग्ण कमी होताच ‘ट्रॉमा’ला लिक्वीड ऑक्सिजनच्या पाईपलाईनशी जोडण्यासाठी येथील रुग्ण नव्या आयसीयूमध्ये दाखल करण्यात आले. परंतु जानेवारी महिन्यात भंडारा जिल्हा रुग्णालयात दहा चिमुकल्यांचा होरपळून मृत्यूचा घटनेने मुख्यमंत्री उद्धव ठाकरे यांनी सर्व रुग्णालयांना फायर आणि इलेक्ट्रिकल ऑडिट सक्तीचे केले. नव्या आयसीयूचे फायर ऑडिट झाले नसल्याने रातोरात येथील रुग्ण पुन्हा ट्रॉमा केअर सेंटरमध्ये दाखल करून त्याला कुलूप ठोकले. परंतु आता दोन महिन्यांचा कालावधी होऊनही आयसीयू बंद आहे. कोरोनाच्या वाढत्या रुग्णसंख्येने मेडिकल प्रशासन अडचणीत आल्याचे दिसून येत आहे.
-फायर ऑडिट झाले, पण निधी नाही
मिळालेल्या माहितीनुसार, सार्वजनिक बांधकाम, विद्युत विभागाने नव्या आयसीयू इमारतीचे व ट्रॉमा केअर सेंटरचे मागील महिन्यात ‘फायर ऑडिट’ केले. त्यानुसार आग प्रतिबंधक यंत्रणेसाठी लागणारा खर्चाचा तपशिल तयार करून तो जिल्हाधिकाऱ्यांकडे पाठविला. साधारण ३ कोटींचा हा खर्च आहे. परंतु अद्यापही निधी न मिळाल्याने आयसीयू बंद ठेवण्यात आले आहे.
-कोरोनाच्या केवळ ५२ खाटा शिल्लक
प्राप्त माहितीनुसार, ट्रॉमा केअर सेंटरमधील तीन ‘आयसीयू’ व दोन ‘एचडीयू’ मिळून कोरोनाच्या रुग्णांसाठी १३४ खाटा आहेत. सध्या येथे ९५ रुग्ण भरती असून ३९ खाटा शिल्लक आहेत. शिवाय, दोन वॉर्ड व पेईंग वॉर्ड मिळून ७२ खाटा असून यातील ५९ खाटांवर रुग्ण आहेत. १३ खाटा शिल्लक आहेत. एकूण २०६ खाटांपैकी १५४ खाटांवर रुग्ण तर केवळ ५२ खाटा रिकाम्या आहेत. नव्या आयसीयूत तातडीने आग प्रतिबंधक यंत्रणा बसविल्यास १२० खाटा सुरू होऊन मेडिकलची मोठी अडचण दूर होण्याची शक्यता आहे.