दप्तराचे ओझे कमी होणार की नाही?

दिवसेंदिवस वाढत चाललेले दप्तराचे ओझे कमी करण्यासाठी उच्च न्यायालयात जनहित याचिका दाखल झाली असून, यावर उद्या मंगळवारी

मुंबई : दिवसेंदिवस वाढत चाललेले दप्तराचे ओझे कमी करण्यासाठी उच्च न्यायालयात जनहित याचिका दाखल झाली असून, यावर उद्या मंगळवारी सुनावणी होणार आहे. स्कूल बॅगच्या ओझ्याने विद्यार्थ्यांवरचा मानसिक व शारीरिक ताण वाढत चालला असल्याने याबाबत न्यायालय काय आदेश देणार, याकडे विद्यार्थी, पालक व सर्वसामान्यांचे लक्ष लागले आहे. चेंबूर येथील स्वाती पाटील यांनी अ‍ॅड. नीतेश नेवसे यांच्यामार्फत ही जनहित याचिका केली आहे. शिक्षण क्षेत्रात गेल्या काही वर्षांत कमालीची स्पर्धा वाढली आहे. त्यामुळे दप्तरातील वह्या व पुस्तकांची संख्या वाढत चालली आहे. मात्र आता प्रत्येक शिक्षक त्याच्या विषयाचा अभ्यास विद्यार्थ्यांना देत असतो. परिणामी विद्यार्थ्यांना त्या त्या विषयांच्या वह्या व पुस्तके शाळेत घेऊन जावी लागतात. याचा विद्यार्थ्यांच्या पाठीवर व मानेवर दुष्परिणाम होत आहे. दप्तराच्या ओझ्याने विद्यार्थ्यांना मानेचे व पाठीचे आजार होत असल्याचे केईएम रुग्णालयाने आधीच स्पष्ट केले आहे. तेव्हा विद्यार्थ्यांच्या आरोग्यासाठी तरी दप्तराचे ओझे कमी करण्यासाठी न्यायालयानेच आदेश द्यावेत, अशी मागणी याचिकेत करण्यात आली आहे. (प्रतिनिधी)