Maharashtra Vidhan Sabha Election 2024 ( Marathi News ) : विधानसभा निवडणुकांची रणधुमाळी सुरू आहे. खासदार शरद पवार यांच्या राज्यभर प्रचारसभा सुरू आहेत. आज पवार यांनी वाई येथे जाहीर सभा घेतली. या सभेतून खासदार पवार यांनी महायुती सरकारवर निशाणा साधला. तसेच सभेतील एका कार्यकर्त्याने शरद पवार यांना एक चिठ्ठी दिली. ही चिठ्ठी वाचून पवार यांनी विरोधकांवर निशाणा साधला.
यावेळी सभेत बोलताना शरद पवार म्हणाले, वाई सारख्या भागाने महाराष्ट्राला कतृत्ववान नेते दिले. राष्ट्रवादी पक्ष सतत तुमच्या पाठीशी उभी राहिली आहे. राष्ट्रवादीमध्ये फूट पडल्यानंतर बहुसंख्य लोक आपल्याला सोडून गेले. हे मला काही नवीन नाही, या आधीही अनेक आमदार मला सोडून गेले होते. या आधी मला ५८ मधील ५२ नेते सोडून गेले होते. नंतर निवडणूक आली, मी महाराष्ट्राभर फिरलो आणि ५२ पैकी एकही आमदार निवडून आलेला नाही. आता दुर्देवाने आता तिच परिस्थिती या ठिकाणी होणार आहे, असा टोलाही शरद पवार यांनी लगावला.
यावेळी सभेत बोलताना अचानक एका कार्यकर्त्याने चिठ्ठी दिली. या चिठ्ठीत गद्दारांचं काय? असं लिहिलं होतं. यावेळी पवार म्हणाले, गद्दारांना पाडा, पाडा असं स्पष्ट सांगितलं. यावेळी सभेत एक जल्लोष सुरु झाला.