कोठडी मृत्यू टाळण्यासाठी मार्गदर्शक सूचना

पोलीस कोठडीतील मृत्यू टाळण्यासाठी मुंबई उच्च न्यायालयाने महाराष्ट्र पोलिसांकरिता मार्गदर्शक सूचना जारी केल्या असून या सूचनांचे पालन बंधनकारक करण्यात आले आहे.

राजेश निस्ताने - यवतमाळ पोलीस कोठडीतील मृत्यू टाळण्यासाठी मुंबई उच्च न्यायालयाने महाराष्ट्र पोलिसांकरिता मार्गदर्शक सूचना जारी केल्या असून या सूचनांचे पालन बंधनकारक करण्यात आले आहे. मुंबई उच्च न्यायालयासमोर सुनावणीसाठी आलेल्या एका पोलीस कोठडीतील मृत्यू प्रकरणानिमित्त या सूचना गेल्या आठवड्यात जारी करण्यात आल्याचे पोलीस सूत्रांनी सांगितले. पोलीस रखवालीतील मृत्यू टाळण्यासाठी आता पोलिसांना खबरदारी घ्यावी लागणार आहे. मानवाधिकार आयोगाने आरोपींसाठी मार्गदर्शक तत्वे यापूर्वीच जारी केली आहेत. प्रत्येक पोलीस ठाण्यात दर्शनी भागाला ती लावलेलीही आहेत. त्याची अंमलबजावणी होते. परंतु पोलीस कोठडीतील मृत्यू टाळण्यासाठी मुंबई उच्च न्यायालयाने पहिल्यांदाच मार्गदर्शक तत्वे जारी केली आहेत. यापूर्वी अशाप्रकारे मृत्यूच्या शेकडो घटना घडल्या आहेत. त्यात कित्येक पोलीस अधिकारी, कर्मचाऱ्यांवर गुन्हे दाखल झाले, त्यांच्यावर खटले चालले, कित्येकांना जन्मठेपेसारख्या कठोर शिक्षेला सामोरे जावे लागले. अनेक ठाणेदार, पोलीस कर्मचाऱ्यांवर आपल्याच ठाण्याच्या ‘लॉकअप’मध्ये राहण्याचा दुर्दैवी प्रसंग आला.