उपराजधानीत जल्लोष: ढोल-ताशे, आतषबाजी
नागपूर : पंतप्रधान नरेंद्र मोदी यांच्या नेतृत्वात केंद्रीय मंत्रिमंडळ शपथ घेत असल्याचे थेट प्रक्षेपण लाखो नागपूरकरांनी वृत्तवाहिन्यांवर पाहिले. शपथ घेण्यासाठी गडकरी यांचे नाव पुकारताच नागपुरात भाजप कार्यकर्त्यांमध्ये उत्साह संचारला. जोरात आतषबाजी करण्यात आली. ढोल-ताशांच्या निनादात कार्यकर्ते नाचले. मिठाई वाटून एकमेकांना शुभेच्छा दिल्या. यानंतर शहरात ठिकठिकाणी आनंदोत्सव साजरा करण्यात आला. रॅलीत जीपवर मोदी गुजराती समाजातर्फे काढण्यात आलेल्या रॅलीत पंतप्रधान नरेंद मोदी यांच्यासारखी दिसणारी तसेच मोदींसारखी वेशभूषा केलेली व्यक्ती सहभागी झाली होती. रॅलीतील जीपमध्ये स्वार असलेल्या या मोदींना नागपूरकरांचे लक्ष वेधून घेतले. लोहाणा महाजनचे माजी अध्यक्ष सुभाष जोबनपुत्रा यांनी ही वेशभूषा धारण केली होती. रॅलीत लोक हर हर मोदींचे नारे लावत होते. लोक प्रतिकात्मक मोदींचे अभिनंदन करीत होते व मोदी ते अभिनंदन स्वीकारत होते. महिला कार्यकर्त्या खेळल्या फुगडी महाल, टिळक पुतळा येथील भाजपच्या कार्यालयासमोर कार्यकर्त्यांनी जल्लोष केला. माजी महापौर कल्पना पांडे, माया इवनाते, महिला आघाडीच्या अध्यक्ष कीर्तिदा अजमेरा यांच्यासह महिला आघाडीच्या कार्यकर्त्यांनी फुगडी धरून आनंद व्यक्त केला. मिठाई खाऊ घालत एकमेकांचे तोंड गोड केले. तत्पूर्वी पदाधिकार्यांनी कार्यालयात बसून टीव्हीवर शपथविधी पाहिला. या वेळी भाजपचे शहर अध्यक्ष आ. कृष्णा खोपडे व भाजयुमोचे शहराध्यक्ष बंटी कुकडे यांनी मिठाई वितरित केली. प्रभागातही आनंदोत्सव साजरा करण्यात आला. (प्रतिनिधी) शपथविधी पाहण्यासाठी लावले स्क्रीन नरेंद मोदी व मंत्रिमंडळाचा राष्ट्रपती भवनातील शपथविधी नागरिकांना लाईव्ह बघता यावा यासाठी शहरात ठिकठिकाणी मोठे स्क्रीन लावण्यात आले होते. व्यापार्यांतर्फे मस्कासाथ येथे सहा मोठे स्क्रीन लावण्यात आले होते. शपथविधी सुरू होताच सर्व व्यापारी, भाजप कार्यकर्ते, नागरिक या स्क्रीनजवळ जमले. गडकरी शपथ घेत असताना सर्वांनी त्यांना पाठिंबा देणार्या घोषणा केल्या. येथे चंदन गोस्वामी, अजय अग्रवाल, गोविंद पटेल, अरविंद पटेल आदी उपस्थित होते. गोळीबार चौकातही स्क्रीन लावण्यात आले. गुजरात भवन, महाल येथेही स्क्रीन लावण्यात आले.