ऑनलाइन लोकमत
मुंबई, दि. २३ - ज्येष्ठ समाजसेवक बाबा आमटे यांना भारतरत्न मिळायला हवं असं मत नाना पाटेकर यांनी एका मुलाखतीमध्ये व्यक्त केले आहे. डॉ. प्रकाश बाबा आमटे या चित्रपटामध्ये मुख्य भूमिकेत असलेल्या नानांनी बाबा आमटेंच्या कामाची स्तुती करताना प्रत्येकानं आपल्या परीनं अशा संस्था चालवण्यासाठी मदत करायला हवी असं सांगताना भारतरत्न पुरस्कारानं गौरवण्याइतकं बाबांचं काम थोर असल्याचं नमूद केलं.
या चित्रपटामध्ये मंदाकिनी आमटेंच्या भूमिकेत सोनाली कुलकर्णी असून तिनंही खूप चांगलं म्हणजे माझ्यापेक्षाही सरस काम केल्याचं कौतुक नानानं केलं आहे. बाबा आमटेंच्या संघर्षाच्या काळामध्ये निधी गोळा करण्यासाठी वेगवेगळे कार्यक्रम आयोजित केले जात असल्याचे सांगताना, नानाने नारायण राणेंचा एक वेगळाच किस्सा सांगितला.
आनंदवनासाठी राज्य सरकारकडून ६० लाख रुपये मिळण्याची अपेक्षा असून ते पैसे मिळत नसल्याचे नानानं राणे यांना सांगितलं होतं. मुख्यमंत्री असलेल्या नारायण राणे यांनी एका आठवड्यानं फोन करून ४० लाख पोचवल्याचं आणि चार दिवसांमध्ये उरलेले २० लाख पोचतील असा निरोप दिल्याची आठवण नानानं सांगितली. प्रकाश आमटेंवरील चित्रपट प्रदर्शनाच्या मार्गावर असून विकास आमटे यांच्यावरही चित्रपट निघावा अशी अपेक्षा नानानं व्यक्त केली आहे.