कृषी तंत्रज्ञान पदविका अभ्यासक्रम मराठीत!

विदर्भातील तीन कृषी तंत्र विद्यालयांचा समावेश.

अकोला : राज्यातील चारही कृषी विद्यापीठांतर्गत असलेला तीन वर्षाचा कृषी तंत्रज्ञान पदविका अभ्यासक्रम पुन्हा दोन वर्षांचा करण्यात आला आहे. यापुढे हा अभ्यासक्रम इंग्रजीऐवजी मराठीतून शिकवला जाणार आहे. महाराष्ट्र कृषी शिक्षण व संशोधन (एमसीईएआर) परिषदेच्या सभेत मागील आठवड्यात हा निर्णय घेण्यात आला आहे. विदर्भातील मलकापूर, सिंदखेडराजा व करडा या तीन कृषी तंत्र विद्यालयांचा यामध्ये समावेश आहे. चारही कृषी विद्यापीठांतर्गत मराठी माध्यम दोन वर्षाचा कृषी तंत्र पदविका, इंग्रजी माध्यमातील कृषी तंत्रज्ञान तीन वर्ष आणि मत्स्य अभियांत्रिकी पदविका तीन वर्षाचा अभ्यासक्रम सुरू आहे. डॉ. पंजाबराव देशमुख कृषी विद्यापीठांतर्गत विदर्भात ४६ खासगी कृषी तंत्रनिकेतन असून, कृषी विद्यापीठाच्या ९ तंत्रनिकेतन शाळांचा समावेश आहे. सुरुवातीला या सर्व शेतकी शाळा होत्या. शेतीशी निगडित दोन वर्षांचा अभ्यासक्रम मराठीत शिकवला जात होता; तथापि गत तीन वर्षांपूर्वी शेतकी शाळेचे रू पांतर कृषी तंत्रनिकेतनमध्ये करण्यात आले असून, हा अभ्यासक्रम इंग्रजी माध्यमात तीन वर्षांचा करण्यात आला आहे. यंदा प्रथमच पहिल्या तुकडीचा निकाल लागला आहे. विदर्भातील ४६ खासगी कृषी तंत्रनिकेतनचा निकाल केवळ १२ टक्के लागला आहे. दरम्यान, मराठी अभ्यासक्रमाच्या मुलांना इंग्रजीचा सामना करावा लागल्याने निकाल कमी लागला असल्याचे कृषी तज्ज्ञांचे मत आहे. या सर्व पृष्ठभूमीवर खासगी कृषी तंत्रनिकेतन संस्थाचालकांनी हा अभ्यासक्रम इंग्रजीऐवजी मराठीतून शिकवण्यासाठीची एमसीईएआरकडे परवानगी मागितली होती. संस्थाचालकांची मागणी विचारात घेऊन एमसीईएआरने इंग्रजीचा मराठी माध्यमात बदल केला आहे. यामध्ये महात्मा फुले कृषी विद्यापीठांतर्गत २६ विद्यालयांचा समावेश असून, स्व. वसंतराव नाईक मराठवाडा कृषी विद्यापीठांतर्गत १३, डॉ.बाळासाहेब सावंत कोकण कृषी विद्यापीठ व डॉ. पंजाबराव देशमुख कृषी विद्यापीठांतर्गत प्रत्येकी ३ कृषी तंत्र विद्यालयाचा समावेश आहे. दरम्यान, इंग्रजी माध्यमातील तीन वर्षांचा अभ्यासक्रम पूर्ण करणार्‍या विद्यार्थ्यांना गुणवत्तेनुसार थेट कृषी पदवी अभ्यासक्रमाच्या द्वितीय वर्षाला प्रवेश दिला जाणार आहे. इंग्रजी माध्यमाच्या कृषी तंत्र विद्यालयांना दोन वर्षांचा मराठी अभ्यासक्रम सुरू करण्याची परवानगी देण्यात आली आहे. मराठी माध्यमाची परवानगी ऐच्छिक आहे. विदर्भातील खासगी संस्थाचालकांनी कृषी विद्यापीठाकडे मागणी केल्यास विद्यापीठ तशी शिफारस करेल, अशी माहिती एमसीईएआर शिक्षण संचालक डॉ. श्रीकांत काकडे यांनी दिली.