लोकमत न्यूज नेटवर्क
जळकोट : जळकोट तालुका काेरोनामुक्त झाला आहे. दरम्यान, आतापर्यंत तालुक्यात १९ हजार १७० जणांची कोविड चाचणी करण्यात आली आहे. तसेच ६ हजार १२८ जणांना कोविड लसीकरण करण्यात आले आहे. संभाव्य तिसऱ्या लाटेच्या पार्श्वभूमीवर आरोग्य विभागाकडून नियोजन करुन तयारी करण्यात येत आहे. तसेच लसीकरणावर भर देण्यात आला आहे.
मध्यंतरीच्या कालावधीत जळकोट तालुक्यात कोविडबाधितांची संख्या वाढली होती. दरम्यान, आरोग्य, महसूल, पंचायत समिती, पोलीस प्रशासनाने प्रभावीपणे जनजागृती करुन प्रतिबंधात्मक उपाययोजना राबविल्या. त्यामुळे तालुक्यातील कोविड बाधितांची संख्या घटली. आता तालुका कोरोनामुक्त आहे. दरम्यान, आरोग्य विभागाच्यावतीने लसीकरणावर भर देण्यात आला आहे. ज्यासाठी जनजागृती करण्यात येत आहे. तालुक्यातील ४ हजार १८१ जणांनी पहिला डोस तर १ हजार ९४७ जणांनी दुसरा डोस घेतला आहे.
जळकोट ग्रामीण रुग्णालयांतर्गत आतापर्यंत ६ हजार ३२५ जणांच्या कोविड चाचण्या करण्यात आल्या. अतनूर प्राथमिक आरोग्य केंद्रामार्फत ५ हजार ९९८, वांजरवाडा प्राथमिक आरोग्य केंद्रांतर्गत ६ हजार ८४७ जणांच्या कोविड चाचण्या करण्यात आल्या. आरोग्य विभागाने चाचण्या वाढविण्याबरोबरच प्रतिबंधात्मक उपाययोजना व लसीकरणावर भर दिल्याने जळकोट तालुका ३० जूनपासून कोरोनामुक्त झाला आहे. त्यामुळे तालुकावासीयांमधून समाधान व्यक्त होत आहे.
तालुक्यात आतापर्यंत १ हजार ८०१ जणांना कोविडचा संसर्ग झाला होता. त्यापैकी १ हजार ६४९ जण उपचारानंतर ठणठणीत झाले तर ५२ जणांचा मृत्यू झाला आहे. कोविडचा संसर्ग रोखण्यासाठी पालकमंत्री अमित देशमुख व राज्यमंत्री संजय बनसोडे यांच्या निर्देशानुसार सातत्याने बैठका घेण्यात आल्या. आरोग्य उपसंचालक डॉ. एकनाथ माले, अपर जिल्हाधिकारी अरविंद लोखंडे, जिल्हा शल्य चिकित्सक डॉ. लक्ष्मण देशमुख, जिल्हा आरोग्य अधिकारी डॉ. गंगाधर परगे, जळकोटच्या ग्रामीण रुग्णालयाचे अधीक्षक डॉ. जगदीश सूर्यवंशी, तालुका वैद्यकीय अधिकारी डॉ. संजय पवार, तहसीलदार संदीप कुलकर्णी, गटविकास अधिकारी चंद्रहार ढोकणे, पोलीस निरीक्षक गणेश सोंडारे, लता शेवाळे आदींनी सातत्याने बैठका घेऊन उपाययोजना राबविल्या.
आरोग्य विभागाकडून नियोजन...
राज्यमंत्री संजय बनसोडे यांच्या आदेशावरुन जळकोटच्या ग्रामीण रुग्णालयात डेडिकेटेड हॉस्पिटल सुरू करण्यात आले. याठिकाणी तत्काळ उपचार मिळाल्यामुळे अनेकजण कोरोनामुक्त झाले. सध्या संपूर्ण तालुका कोरोनामुक्त आहे. कोरोनाच्या संभाव्य तिसऱ्या लाटेच्या पार्श्वभूमीवर आरोग्य विभागाकडून नियोजन करुन तयारी करण्यात येत आहे, अशी माहिती ग्रामीण रुग्णालयाचे अधीक्षक डॉ. जगदीश सूर्यवंशी, तालुका वैद्यकीय अधिकारी डॉ. संजय पवार, डॉ. सचिन सिद्धेश्वरे यांनी दिली.