Walawalkar Hospital rushed to help Mangesh | 'मंगेश'च्या मदतीसाठी धावले वालावलकर हॉस्पिटल

'मंगेश'च्या मदतीसाठी धावले वालावलकर हॉस्पिटल

ठळक मुद्दे'मंगेश'च्या मदतीसाठी धावले वालावलकर हॉस्पिटल'लोकमत'ने मांडली होती मंगेशची कहाणी

नेसरी : वर्षभरापूर्वी हरळी (ता. गडहिंग्लज) जवळ झालेल्या मोटारसायकल अपघातात पाठीचा मणका मोडलेल्या मंगेश गुरव या तरुणाच्या मदतीसाठी कोकणातील डेरवण-सावर्डे येथील वालावलकर हे हॉस्पिटल धावून आले आहे.

मुंबई येथील एका खासगी हॉस्पिटलमध्ये या शस्त्रक्रियेसाठी सुमारे ८ लाख रुपये खर्च येणार होता. ती शस्त्रक्रिया आता वालावलकर हॉस्पिटलमध्ये कमी खर्चात होणार आहे. त्यांच्या या मदतीमुळे पीडित मंगेशच्या सामान्य जीवन जगण्याच्या आशा पल्लवित झाल्या आहेत. 'लोकमत'ने २७ मार्च रोजी 'बिद्रेवाडीच्या गुरवला हवी मदत' या मथळ्याखाली वृत्त प्रसिद्ध करून, वर्षभर अंथरुणावर पडून असलेल्या गरीब मंगेशच्या, अपघातामुळे झालेल्या परिस्थितीची व्यथा मांडली होती.

कोकणातील प्रसिद्ध व सेवाभाव जपलेले वालावलकर हॉस्पिटलच्या ट्रस्टींनी याची दखल घेऊन या गरीब तरुणाची शस्त्रक्रिया करण्याची तयारी दर्शवली. त्यानुसार दवाखान्याचे त्याचे मागील सर्व रिपोर्ट पाहून डॉक्टरांनी होकार कळविला.

कोगनोळी येथील सेवाभावी कार्यकर्ते सुनील आबदागिरी व नेसरी येथील गुलाबराव पाटील व रवींद्र हिडदुगी यांच्या प्रयत्नातून डेरवण येथे नुकताच तो अ‍ॅडमिट झाला आहे. तेथे त्याच्या सर्व प्राथमिक चाचण्या घेतल्या जात असून लवकरच त्याच्यावर शस्त्रक्रिया होणार आहे. राज्यातील नामवंत व प्रसिद्ध ऑर्थोपेडिक तज्ज्ञ डॉ. नाडकर्णी यांच्या मार्गदर्शनाखाली ही शस्त्रक्रिया होणार आहे.

आता शस्त्रक्रियेसाठीचा प्रश्न जरी मिटला असला तरी, औषधे व उर्वरित खर्चासाठी त्याला आर्थिक मदतीची गरज आहे. त्यासाठी दानशूर व्यक्ती व सेवाभावी संस्थांनी मदतीचा हात द्यावा, असे आवाहन सामाजिक कार्य समितीने केले आहे.

 एस. एस.च्या माजी विद्यार्थ्यांनी दिली मदत 'लोकमत'मधील मंगेशच्या हलाकीची बातमी वाचून एस. एस. हायस्कूल नेसरीच्या १९९० च्या दहावीच्या वर्गमित्रांनी ११ हजाराची मदत देऊन सामाजिक बांधिलकी जोपासली. संतोष नौकुडकर, दिलीप पाटील, उमेश दळवी, बाळू वांजोळे आदींनी ही मदतीची रक्कम सुपूर्द केली.

मदतीचा ओघ सुरू

येथील सामाजिक कार्यकर्ते अनिल देसाई यांनी २ हजार, तर बापूसाहेब घवाळे यांनी ५ हजारांची मदत दिली. ही सर्व मदत मंगेशच्या बँक खात्यावर वर्ग करण्यात आली आहे.मंगेशचा कमरेखालचा भाग लुळा पडला असून त्याला पुन्हा उभारी येण्यासाठी डॉक्टर शर्थीचे प्रयत्न करीत आहेत.

 

 

Web Title: Walawalkar Hospital rushed to help Mangesh

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.