कोल्हापूर : कोरोनाचा वाढता प्रभाव लक्षात घेऊन महानगरपालिकेची यंत्रणा आता अधिक सक्रिय झाली असून गुड फ्रायडेची सुट्टी असतानाही आरोग्य विभागाचे कर्मचारी शुक्रवारी कोरोना प्रतिबंधात्मक उपाययोजना राबविण्यात
व्यस्त होती. शुक्रवारी दिवसभरात शहरातील १,८६१ व्यक्तींवर लसीकरण करण्यात आले. नागरिकांचाही या लसीकरणास मोठा प्रतिसाद मिळत आहे.
कोरोना प्रतिबंधात्मक उपाययोजना राबविणे आणि लसीकरण करण्यावर महापालिका आरोग्य विभागाने लक्ष केंद्रित केले आहे. शहरात जमावबंदी आदेश लागू करण्यात आल्यामुळे महापालिकेची काही पथके शहरात फिरत होती. लाऊडस्पीकर लावलेल्या वाहनातून लोकांनी गर्दी करू नये, शारीरिक अंतर ठेवून व्यवहार करावे, असे आवाहन करत फिरत होती. मुख्य बाजारपेठ, दुकान लाईन येथे या पथकांचे विशेष लक्ष होते.
बिंदू चौक, मिरजक तिकटी, लक्ष्मीपुरी, पापाची तिकटी या ठिकाणी विनामास्क फिरणाऱ्या नागरिकांवर दंडात्मक कारवाई केली जात होती. केंद्र सरकारने शहरातील सात ठिकाणे ही हॉटस्पॉट ठरणार असल्याची पूर्वकल्पना दिली आहे. त्यामुळे या
सात ठिकाणावर विशेष लक्ष ठेवले जात आहे. कोरोनाचे रुग्ण आता कोल्हापूर जिल्ह्याबरोबरच शहरातही वाढत आहेत. रोज साधारणपणे ४० ते ४५ रुग्ण नव्याने कोरोना बाधित होत आहेत. त्यामुळे शहरात स्वॅब घेण्याचे प्रमाणही वाढविण्यात आले आहे. शुक्रवारी ८५१ व्यक्तींचे स्वॅब तपासणीसाठी घेण्यात आले.
अकरा नागरी आरोग्य केंद्रे व १८ खासगी रुग्णालयात दिवसभरात १,८६१ जणांना कोरोनाची लस देण्यात आली. सकाळी १० ते सायंकाळी ५ या वेळेत लसीकरण सुरू आहे. लसीकरणाची व्याप्ती लक्षात घेऊन ती सुट्टीच्या दिवशीही सुरू ठेवण्यात आली आहे.
आयसोलेशन रुग्णालयात सकाळी तर महानगरपालिका मुख्य प्रशासकीय इमारतीत सायंकाळी कोरोनासंबंधीच्या उपायोजनाबाबत आढावा बैठक झाली. मुख्य आरोग्य अधिकारी डॉ. अशोक पोळ यांच्यासह काही वैद्यकीय अधिकारी यावेळी उपस्थित होते.