बेरोजगार तरुणांनी माझा व्यवसाय, माझा हक्क योजनेचा लाभ घ्यावा

कागल

लहान- मोठ्या उद्योगधंद्यासाठी अनुदान आणि कर्ज मिळवून देऊन रोजगार उपलब्ध करून देण्यासाठी मुख्यमंत्री रोजगार निर्मिती हा कार्यक्रम सुरू केला आहे. ‘माझा व्यवसाय, माझा हक्क’ या योजनेचा बेरोजगारांनी लाभ घ्यावा. जिल्हा बँक स्वयंरोजगार योजनेसाठी लवकरच आपले धोरण जाहीर करेल, असे प्रतिपादन ग्रामविकासमंत्री हसन मुश्रीफ यांनी केले.

कागल येथे आज शासनाच्या या योजनेचा पश्चिम महाराष्ट्रातील शुभारंभ मंत्री मुश्रीफ यांच्या हस्ते करण्यात आला. त्यावेळी ते बोलत होते.

उद्योजक कौस्तुभ बुटाला, नगराध्यक्षा माणिक माळी, युवराज पाटील, उपनगराध्यक्ष बाबासाहेब नाईक, भय्या माने, शशिकांत नाईक, यांच्यासह विविध शासकीय अधिकारी उपस्थितीत होते. ना. हसन मुश्रीफ फाउंडेशनच्या माध्यमातून कागल विधानसभा मतदारसंघात हा उपक्रम राबविण्यात येणार आहे.

मंत्री मुश्रीफ म्हणाले की, राज्यात जास्तीत जास्त रोजगार निर्मिती करण्याचा प्रयत्न महाविकास आघाडी सरकार करीत आहे. शासनाच्या विविध विभागांत तीस हजार जागा भरण्याचा निर्णय घेतला आहे; पण मराठा आरक्षणाच्या निर्णयासाठी भरती प्रक्रिया सुरू केलेली नाही.

स्वागत प्रास्ताविक भाषणात फाउंडेशनचे अध्यक्ष नवीद मुश्रीफ म्हणाले की लहान व्यावसायिक वाहन खरेदी करून त्या माध्यमातून विविध वस्तू खाद्यपदार्थ विक्री करण्यासाठी अनुदान आणि अर्थसाहाय्य देणारी ही योजना प्रभावीपणे राबविण्यात येईल. यावेळी कौस्तुभ बुटाला, समाज कल्याण विभागाचे सहायक आयुक्त विशाल लोंढे, जिल्हा उद्योग केंद्राचे व्यवस्थापक सतीश शेळके यांची भाषणे झाली. आभार शिवाजी पाटील यांनी मानले.

३० कागल योजना प्रारंभ

फोटो कॅपशन.

कागल येथे ‘माझा व्यवसाय, माझा हक्क’ या स्वयंरोजगार योजनेच्या शुभारंभप्रसंगी मंत्री हसन मुश्रीफ यांनी मार्गदर्शन केले. यावेळी नवीद मुश्रीफ, भय्या माने, युवराज पाटील आदी मान्यवर उपस्थित होते.