कोल्हापूर : येथील मध्यवर्ती बसस्थानकात दोन बसमध्ये चिरडून दोघीजणी गंभीर जखमी झाल्या. ही घटना शनिवारी सायंकाळी घडली. सिध्दी मच्छेंद्र डवरी (वय २१) व तिची मैत्रीण किरण यादव (जोतिबा डोंगर, वाडी रत्नागिरी, ता. पन्हाळा) अशी जखमी झालेल्या दोघींची नावे आहेत.
पोलिसांनी दिलेली माहिती अशी की, सिध्दी डवरी व किरण यादव या दोघी मैत्रिणी जोतिबा गावी जाण्यासाठी कोल्हापुरात मध्यवर्ती बसस्थानकात आल्या. जोतिबा बसस्टाॅपवर थांबल्या होत्या. त्याचवेळी बस पुढे-मागे घेण्याच्या प्रयत्नात दोन बसमध्ये सापडल्याने चिरडून दोघीही मैत्रिणी गंभीर जखमी झाल्या. त्यांना उपचारासाठी सीपीआर रुग्णालयात दाखल केले. शिवशाही बस हयगयीने व निष्काळजीपणे चालूवन दोघींना जखमी केल्याचा ठपका ठेवून बसचालक नामदेव श्रीरंग पाटील (मुमेवाडी, ता. आजरा) यांच्यावर शाहूपुरी पोलीस ठाण्यात शनिवारी रात्री उशिरा गुन्हा दाखल करण्यात आला आहे.