शिरोळमधील २७ गावांमधील क्षारपड जमिनीचा सर्व्हे होणार

कुरुंदवाड : शिरोळ तालुक्यामधील २७ गावांमधील क्षारपड जमिनीच्या सव्हेर्चे काम लवकरच सुरू केले जाईल. त्यासाठी रुपये ५२ लाखांच्या निधीची मागणी केली असून निधी लवकरच मंजूर करून घेतला जाईल, अशी माहिती सार्वजनिक आरोग्य राज्यमंत्री राजेंद्र पाटील-यड्रावकर यांनी दिली. शिरढोण (ता. शिरोळ) येथे विकासकामांचे उद्घाटन झाले. यावेळी मंत्री यड्रावकर म्हणाले, क्षारपड झालेल्या सर्व जमिनींचा सर्व्हे करण्याचे काम शासनाच्या पाटबंधारे विभागाकडून लवकरच सुरू केले जाणार आहे. महाविकास आघाडी सरकार सत्तेत आल्यानंतर शिरोळ तालुक्यासह पश्चिम महाराष्ट्रातील क्षारपड जमीन सुधार योजना राबविण्यासाठी राज्य शासनाने सकारात्मक निर्णय घेतला आहे. क्षारपड जमीन सुधार योजनांसाठी शासन शेतकऱ्यांना मदत करणार असल्याबाबतचा निर्णय जलसंपदा मंत्री जयंत पाटील आणि मंत्रिमंडळाने घेतला आहे.

राज्यमंत्री राजेंद्र पाटील-यड्रावकर यांच्या स्थानिक विकास निधीमधून आणि शासनाच्या २५१५ योजनांमधून मंजूर जवळपास १ कोटी २७ लाख रुपये खर्चाच्या विकासकामांचे उद्घाटन शुक्रवारी शिरोळ तालुक्यामधील बस्तवाड, अकिवाट व शिरढोण या गावांमध्ये करण्यात आले. यावेळी ग्रामस्थ उपस्थित होते.