समीर देशपांडे
लोकमत न्यूज नेटवर्क
कोल्हापूर : महाराष्ट्र आरोग्य विज्ञान विद्यापीठाच्यावतीने घेण्यात आलेल्या एक्झिट एक्झाममध्ये राज्यातील २८९२ उमेदवार उत्तीर्ण झाले आहेत. त्यामुळे या सर्वांची आता राज्यातील १५ हून अधिक जिल्ह्यांत आरोग्य उपकेंद्रांवर नियुक्ती करण्यात येणार आहेत. यासाठी येणाऱ्या आठवड्यात नियुक्तीचे आदेश देण्यात येणार आहेत.
ग्रामीण भागातील आरोग्य सेवा बळकट करण्यासाठी प्रत्येक आरोग्य केंद्रांवर समुदाय आरोग्य अधिकारी नियुक्ती करण्याचा निर्णय शासनाने घेतला होता. १५ जिल्ह्यांमधील याबाबतची प्रक्रिया आधीच पूर्ण झाली आहे. आता राज्यातील उर्वरित जिल्ह्यांसाठी ही प्रक्रिया राबविण्यात आली आहे.
समुदाय आरोग्य अधिकारी पदासाठी तीन टप्प्यांत परीक्षा घेण्यात आली. सुरुवातीला बहुपर्यायी प्रश्न, नंतर सहा महिन्यांचे नाशिक येथे प्रशिक्षण आणि नंतर लेखी परीक्षा हे तीन टप्पे होते. या अंतिम लेखी परीक्षेसाठी राज्यातील ३०५१ उमेदवार बसले होते. त्यातील २८९२ जण उत्तीर्ण झाले आहेत.
या सर्वांची गुणवत्ता यादी जाहीर करण्यात आली असून, गुणवत्तेनुसार त्यांची समुपदेश तत्त्वानुसार उपकेंद्रांवर नियुक्ती करायची आहे. त्यासाठी मुख्य कार्यकारी अधिकाऱ्यांच्या अध्यक्षतेखाली समिती स्थापन करण्यात आली असून, जिल्हा आरोग्य अधिकारी, आरोग्य उपसंचालक सदस्य, तर जिल्हा कार्यक्रम व्यवस्थापक समितीचे सचिव राहणार आहेत. समुपदेशनाच्या एक दिवस आधी गुणवत्ता यादी कार्यालयाच्या नोटीस बोर्डावर आणि संकेतस्थळावर प्रसिद्ध करण्याच्या सूचना देण्यात आल्या आहेत. १० डिसेंबरपर्यंत या नव्या आरोग्य अधिकाऱ्यांनी आपल्या कामाच्या ठिकाणी रुजू व्हायचे आहे.
---------------------------
तीन वर्षे सेवा न केल्यास १ लाख रुपये दंड
या उमेदवारांना सहा महिने नाशिक येथे प्रशिक्षण देण्यात आले आहे. त्या दरम्यान त्यांना प्रतिमहिना १० हजार रुपये विद्यावेतन देण्यात आले आहे. त्यामुळे या प्रक्रियेनुसार नियुक्ती झाल्यानंतर कराराप्रमाणे जर जिल्ह्यात ३ वर्षे सेवा केली नाही तर अशा आरोग्य अधिकाऱ्यांना १ लाख ३ हजार रुपये दंड करण्यात येणार आहे. तसे करारनाम्यामध्ये नमूद करण्यात आले आहे.