कोल्हापूर : ज्या बसमधून अल्पवयीन पीडित मुलगी शाळेला जात होती, त्याच बसवरील चालकाने तिच्यावर लैंगिक अत्याचार केल्याप्रकरणी विशेष जादा जिल्हा न्यायाधीश ए. एस. महात्मे यांनी आरोपीस चार वर्षे सक्तमजुरी व २० हजार रुपये दंडाची शिक्षा सुनावली. धनाजी विश्वास कोळी (वय २५, रा. लाटवडे, ता. हातकणंगले) असे शिक्षा झालेल्याचे नाव आहे. विशेष सरकारी वकील अमिता ए. कुलकर्णी यांनी काम पाहिले.
खटल्याची थोडक्यात पार्श्वभूमी अशी की, आरोपी धनाजी कोळी हा पीडित मुलीच्या शाळेच्या बसवर चालक म्हणून कार्यरत होता, त्याने पीडित अल्पवयीन मुलीची ओळख वाढवून ती शाळेला ये-जा करताना तिचा पाठलाग केला. दि.१७ फेब्रुवारी २०१८ रोजी आरोपीने पीडित मुलीचा वडगाव ते नागावपर्यंत दुचाकीवरून पाठलाग केला. तिचा हात पकडून मनात लज्जा उत्पन्न होईल असे कृत्य केले. याप्रकरणी वडगाव पोलीस ठाण्यात कोळी याच्यावर बाललैंगिक अत्याचारपासून संरक्षण कायद्यान्वये गुन्हा नोंद झाला होता.
खटल्यात एकूण आठ साक्षीदार तपासले. पीडित मुलीची साक्ष महत्त्वाची ठरली. तसेच साक्षीदारांचे जबाब, विशेष सरकारी वकील कुलकर्णी यांचा युक्तिवाद, दाखल निवाडे ग्राह्य मानून न्यायालयाने आरोपी धनाजी कोळी याला चार वर्ष सक्तमजुरी व वीस हजार रुपये दंडाची शिक्षा सुनावली. खटल्यात विशेष सरकारी वकिलांना ॲड. भारत शिंदे, ॲड. महेंद्र चव्हाण, तपास अधिकारी पोलीस उपअधीक्षक कृष्णात पिंगळे, सहायक फौजदार शाम बुचडे, पैरवी अधिकारी मिलिंद टेळे व माधवी घोडके यांचे सहकार्य लाभले.
फोटो नं. २००९२०२१-कोल-धनाजी कोळी (आरोपी)
200921\20kol_1_20092021_5.jpg
फोटो नं. २००९२०२१-कोल-धनाजी कोळी (आरोपी)