कोविड केंद्रांना मनुष्यबळ, औषध, साधनसामुग्रीची जबाबदारी माळींकडे

कोल्हापूर : जिल्ह्यातील सर्व कोविड केअर सेंटर (सीसीसी) व डेडिकेटेड कोविड हेल्थ सेंटर (डिसीएचसी) साठी आवश्यक मनुष्यबळ, औषधे, वैद्यकीय साधनसामग्री व इतर अनुषंगिक कामकाजाचे व्यवस्थापन जिल्हा शल्यचिकित्सक डॉ. अनिल माळी यांच्याकडे सोपविण्यात आले आहे. जिल्हाधिकारी दौलत देसाई यांनी याबाबतचे आदेश काढले.

जिल्हा शल्यचिकित्सक डॉ. अनिल माळी यांनी सर्व कोविड केअर सेंटर व डेडिकेटेड कोविड हेल्थ सेंटरच्या वैद्यकीय अधीक्षक व इतर संबंधित सर्व अधिकारी यांच्याशी संपर्कात राहून क्षेत्रीय स्तरावरील मनुष्यबळ व साधन सामग्री व्यवस्थापन व सनियंत्रण करावे. यासाठी अतिरिक्त जिल्हा आरोग्य अधिकारी डॉ. यू. जी. कुंभार व जिल्हा माता बाल संगोपन अधिकारी डॉ. फारुख देसाई यांनी आवश्यक ते सर्व सहकार्य करावे, असे आदेशात नमूद करण्यात आले आहे.