लोकमत न्यूज नेटवर्क
कोल्हापूर : महाआवास अभियानातंर्गत राज्यातील आठ लाख लाभार्थ्यांना वेळेत घरकुले बांधून देण्याचे ग्रामविकास विभागाचे कामगिरी कौतुकास्पद असल्याचे गौरवोद्गार मुख्यमंत्री उद्धव ठाकरे यांनी मंगळवारी काढले. महाआवासतंर्गत ३.२३ लाख लाभार्थ्यानी ई गृहप्रवेश केला. मुख्यमंत्री ठाकरे यांच्या हस्ते मुंबईत प्रातिनिधीक स्वरुपात त्यांना घरकुलांच्या चाव्या देण्यात आल्या.
मागील दीड वर्षांपासून राज्य कोरोनाच्या संकटाशी लढत असताना आपण नागरिकांना घरात राहा, सुरक्षित राहा असे आवाहन करत होतो; परंतु घर नसलेल्यांनी घरात कसे राहायचे, भूमीहिनांनी घरात सुरक्षित कसे राहायचे हा प्रश्न होता, ज्याचे उत्तर आज ग्रामविकास विभागाने दिले आहे.
ग्रामविकास मंत्री हसन मुश्रीफ म्हणाले की, कोरोनाचे संकट असतानाही सर्व यंत्रणेने एकजुटीने हे अभियान यशस्वी केले. भूमिहीन लाभार्थ्यांना जागा उपलब्ध करून देण्यात आली. गवंडी प्रशिक्षण, घरकुल मार्ट, बहुमजली इमारती, गृहसंकुले यांसारखे वेगवेगळे प्रयोग करून घरांचा दर्जा चांगला राहील यासाठी दक्षता घेतली. यावेळी सामाजिक न्यायमंत्री धनंजय मुंडे, ग्रामविकास राज्यमंत्री अब्दुल सत्तार यांनी मनोगत व्यक्त केले.
मुख्यमंत्री ठाकरे यांच्या हस्ते ‘महाआवास अभियान-यशोगाथा’ या पुस्तिकेचे आणि राज्य व्यवस्थापन कक्ष-ग्रामीण गृहनिर्माण कार्यालयाची दिनदर्शिका (शैक्षणिक वर्ष) चे प्रकाशन करण्यात आले. त्याचबरोबर ‘महा आवास’ संकेतस्थळाचा प्रारंभही करण्यात आला. खासदार राहुल शेवाळे, खासदार विनायक राऊत, मुख्यमंत्र्यांचे अपर मुख्य सचिव आशिषकुमार सिंह, विभागाचे अपर मुख्य सचिव राजेशकुमार, मुख्यमंत्र्यांचे प्रधान सचिव विकास खारगे, सचिव आबासाहेब जऱ्हाड, सामाजिक न्याय विभागाचे प्रधान सचिव श्याम तागडे, राज्य व्यवस्थापन कक्ष (ग्रामीण गृहनिर्माण) संचालक डॉ. राजाराम दिघे उपस्थित होते. जिल्हा परिषद अध्यक्ष, पंचायत समिती सभापती, सरपंच, विभागीय आयुक्त, जिल्हाधिकारी, जिल्हा परिषदांचे मुख्य कार्यकारी अधिकारी, ग्रामपंचायतीचे सदस्य आणि घरकुल लाभार्थ्यांसह ग्रामविकास विभागाचे अधिकारी आणि इतर मान्यवर ऑनलाईन प्रणालीद्वारे उपस्थित होते.
फोटो ओळी :
महाआवास अभियानातंर्गत लाभार्थ्यांना प्रातिनिधीक स्वरुपात चाव्यांचे वाटप मंगळवारी मुंबईत मुख्यमंत्री उद्धव ठाकरे यांच्या हस्ते झाले. यावेळी ग्रामविकास राज्यमंत्री अब्दुल सत्तार, ग्रामविकास मंत्री हसन मुश्रीफ, सामाजिक न्यायमंत्री धनंजय मुंडे उपस्थित होते. (फोटो-१५०६२०२१-कोल- घरकुल)