कोल्हापूर : गोकुळचा विषय संपला आहे. कॉंग्रेस म्हणून पी. एन. पाटील आणि मी एकत्रच आहोत. यापुढेही स्थानिक स्वराज्य संस्थांच्या निवडणुका एकत्रच लढवणार असल्याचे पालकमंत्री सतेज पाटील यांनी रविवारी पत्रकारांशी बोलताना स्पष्ट केले.
अलिकडेच झालेल्या गोकुळच्या निवडणुकीत आमदार पी. एन. पाटील यांनी पालकमंत्री पाटील यांचे राजकीय विरोधक माजी आमदार महादेवराव महाडीक यांच्यासोबत राहिले. या निवडणुकीत पालकमंत्री पाटील यांनी बाजी मारली. दरम्यान, एकाच पक्षात असूनही गोकुळच्या निवडणुकीत परस्पर विरोधी राजकीय भूमिका घेतल्याने पी. एन. पाटील आणि सतेज पाटील यांच्यात राजकीय दुरावा निर्माण झाल्याच्या भावना सामान्य कार्यकर्त्यांमध्ये निर्माण झाल्या होत्या. निवडणुकीनंतर हे दोघेही सार्वजनिक कार्यक्रमात एकत्र आले नव्हते. रविवारी कॉंग्रेस कमिटी कार्यालयासमोर केंद्र सरकार विरोधात निदर्शनावेळी पाहिल्यांदा हे दोघेही एकत्र आले. पी. एन. पाटील नंतर सतेज पाटील निदर्शनाच्या ठिकाणी दाखल झाले. दोघांनी एकमेकांकडे पाहत स्मितहास्य केले. त्यांच्या स्मितहास्याकडे पदाधिकारी, कार्यकर्तेही लक्ष देवून पाहताना दिसले.
दरम्यान, निदर्शनानंतर पत्रकार परिषद झाल्यानंतर पालकमंत्री पाटील यांना तुम्ही आणि आमदार पी. एन. पाटील पहिल्यांदाच एकत्र आल्याकडे पत्रकारांनी लक्ष वेधले. यावर आम्ही दोघेही एकत्रच असल्याचा त्यांनी खुलासा केला.