कोल्हापूर : जिल्हा परिषद आरोग्य विभागाच्या वतीने सुरू असलेल्या दैनंदिन सर्वेक्षणामध्ये एक हजार ग्रामस्थांपैकी ४४ जण व्याधीग्रस्त असल्याचे स्पष्ट झाले आहे. सोमवारी दिवसभरामध्ये हे सर्वेक्षण करण्यात आले असून यातील ५२ ग्रामस्थांचे कोरोनाचे अहवालही पॉझिटिव्ह आले आहेत.
आरोग्य विभागाने १ एप्रिलपासून जिल्हा परिषदेच्या ७५ प्राथमिक आरोग्य केंद्रांतर्गत असणाऱ्या ११९७ गावांमध्ये २७९३ पथकांच्या माध्यमातून हे सर्वेक्षण सुरू आहे. दर पाच दिवसांनी हे सर्वेक्षण करण्यात येते. या अंतर्गत ७ लाख ५७ हजार ६८० घरांपैकी ८३ हजार ५११ घरांना भेटी देण्यात आल्या आहेत. १ एप्रिलपासून आतापर्यंत ११ लाख ३७ हजार ६६४ घरांमधील ग्रामस्थांचे सर्वेक्षण करण्यात आले आहे.
या यंत्रणेच्या माध्यमातून ग्रामस्थांची माहिती घेतली असता सोमवारी दिवसभरामध्ये ८०५४ व्यक्ती व्याधीग्रस्त असल्याचे स्पष्ट झाले असून आतापर्यंत गेल्या २६ दिवसांमध्ये १ लाख २९ हजार ०९६ जण व्याधीग्रस्त असल्याचे स्पष्ट झाले आहे. याचे दरहजारी प्रमाण काढले असता ते ४४ इतके असून या ग्रामस्थांना रक्तदाब, मधुमेह, हृदयविकार यासारख्या व्याधी असल्याचे स्पष्ट झाले आहे. यातील तीव्र श्वसनाचा त्रास असलेल्यांची संख्या अतिशय कमी असून ती २५ इतकी आहे.
अनेक ठिकाणी ग्रामस्थ कोरोनाची लक्षणे असतानाही चाचणीसाठी जात नसल्याचे स्पष्ट झाल्यामुळे जाणीवपूर्वक कोरोना डोळ्यासमोर ठेवून केलेल्या या सर्वेक्षणामध्ये ५३८ जणांना कोरोना चाचणीसाठी संदर्भीत करण्यात आले. यातील १९७ जणांना कोरोना झाल्याचे स्पष्ट झाले आहे.
चौकट
एकूण प्राथमिक केंद्रे ७५
गावांची संख्या ११९७
कार्यरत पथकांची संख्या २७९३
१ एप्रिलपासून सर्वेक्षण केलेली घरे ११ लाख ३७ हजार ६६४
तापसदृश्य लक्षणे आढळलेले ग्रामस्थ १० हजार २९९
तीव्र श्वसन दाह असलेले ग्रामस्थ २५
अन्य व्याधीग्रस्त १ लाख २९ हजार ०९६
पॉझिटिव्ह आलेले रुग्ण १९७