ते म्हणाले, अंबाबाईच्या स्नानाचे पाणी जाते त्या पुरातन मनकर्णिका कुंडाच्या उत्खननाचे काम सध्या वेगाने सुरू आहे. या परिसरावर देवस्थान समितीची मालकी असून, कुंड मुजवल्यानंतर त्या शेजारील माउली लॉजचे उपयोगात नसलेले एक ऑफिस कुंडावर बांधण्यात आले आहे. उत्खननादरम्यान ही बाब समितीच्या लक्षात आल्यानंतर त्यांनी जागेची मोजणी करून घेतली व महापालिकेला हे अतक्रिमण काढण्याची विनंती केली. मात्र, महापालिकेने कोणतीही कारवाई केली नाही.
समितीने लॉजमालकांशी चर्चा केली, देवीचे काम आहे सहकार्य करा अशी विनंती केल्यावर समोर होकार दिला आणि नंतर देवस्थान विरोधात न्यायालयात याचिका दाखल केली. या लॉजचे बांधकाम बेकायदेशीर झाले असून, कम्प्लिशन सर्टिफिकेट, महापालिकेची एनओसी अशा कोणत्याही नियमावलीचे पालन केले नाही. उलट समितीच्याच जागेवर केलेले अतक्रिमित बांधकाम पाडू नये म्हणून स्थगिती आणली आहे. शिवाय सुरक्षिततेसाठी लावलेले पडदेही दोनदा काढून टाकले आहेत.
---
फूलवाल्यांचे मोठे सहकार्य
उत्खननासाठी हातावरचे पोट असलेल्या फूलवाल्यांनी मोठे सहकार्य केले. चर्चेनंतर तातडीने दुकाने उतरवून घेतली व पुढे १५ फूट जागेत नव्याने कमी जागेत दुकाने उभारली. देवीसाठी सर्व घटकांचे सहकार्य होत असताान माउली लॉजने घातलेल्या आडकाठीमुळे त्या भागातील उत्खननाने काम थांबले आहे.
---
देवस्थानच्या अतिक्रमण झालेल्या जागेत कुंडात उतरण्यासाठीच्या पायऱ्या आहेत. येथील उत्खनन करताना इमारत पडण्याची शक्यता आहे. माउली लॉजचे मालक देवीच्याच कृपेने व्यवसाय करत आहेत आणि तिच्याच कामात अडवणूक करत आहेत. त्यामुळे महापालिकेने तत्काळ त्यांच्यावर कारवाई करावी.
महेश जाधव (अध्यक्ष प. म. देवस्थान समिती)
--