निपाणी : निपाणी शहरासह ग्रामीण भागातही आता कोरोनाचा फैलाव वाढला आहे. सध्या ग्रामीण भागात ताप, सर्दी खोकल्याची साथ असून या नागरिकांनी कोरोना चाचणी करून घेण्यासाठी पुढाकार घेणे महत्त्वाचे आहे. ग्रामीण भागातील नागरिक चाचणीसाठी पुढे येत नसल्याने अनेक पॉझिटिव्ह असलेले रुग्ण ही बिनधास्त आहेत. असे रुग्ण किरकोळ आजार समजून कोरोना स्प्रेडर ठरत आहेत.
निपाणी तालुक्यात दिवसेंदिवस कोरोना रुग्णांच्या संख्येत वाढ होत आहे. निपाणी शहरातील पाच कोविड केअर सेंटरमध्ये रुग्णांवर उपचार सुरू आहेत. अशा परिस्थितीत तालुक्यातील ग्रामीण भागात ताप, सर्दी, खोकला यासह अन्य आजाराचे रुग्ण आढळून येत आहेत. हे रुग्ण किरकोळ आजार समजून गावातील रुग्णालयात उपचार घेत आहेत. आशा रुग्णांनी विलगीकरणात राहणे आवश्यक आहे.
ताप, सर्दी यासह अन्य आजारांवर उपचार घेणारे रुग्ण किरकोळ आजार समजून समाजात मुक्तपणे वावरत असल्याने काही रुग्ण कोरोना स्प्रेडर ठरता आहेत. चाचणीच करून न घेतल्याने सदर रुग्ण पॉझिटिव्ह की निगेटिव्ह कळेनासे झाले आहे. त्यामुळे स्वतःला लक्षणे असलेल्या रुग्णांनी चाचणी करून घेतल्यास समाजाच्या हिताचे होणार आहे. त्यामुळे घाबरून न जाता अशा रुग्णांनी स्वतःहून चाचणी करून घेणे आवश्यक आहे.