कोल्हापूर : प्रसिध्द जादूगार जितेंद्र रघुवीर हे लॉकडाऊननंतर आता संपूर्ण कुटुंबासाठी नवीन जादूचे प्रयोग सादर करणार आहेत. शनिवारी (दि. १३) सायंकाळी पाच वाजता सांगली येथील भावे नाट्यगृहात, तर रविवारी (दि. १४) सायंकाळी पाच वाजता कोल्हापुरातील केशवराव भोसले नाट्यगृहात हे प्रयोग होणार आहेत. त्यामुळे सांगली आणि कोल्हापूरमधील प्रेक्षकांची अकरा महिन्यांची प्रतीक्षा संपणार आहे.
गेल्या दोन आठवड्यात त्यांचे पुणे, रत्नागिरीमधील प्रयोग हाऊसफुल्ल होते. या प्रयोगांच्या माध्यमातून संपूर्ण कुटुंबाला शंभर टक्के सुरक्षित मनोरंजनाची संधी उपलब्ध होणार आहे. कोरोनाच्या पार्श्वभूमीवर अल्टरनेट सिटींग, सॅनिटायझेशन, ऑक्सिजन आणि टेम्परेचर चेकिंग, आदी स्वरूपातील आवश्यक ती दक्षता घेऊन हे प्रयोग होतील. अडीच तासांच्या या प्रयोगामध्ये सुमधूर संगीत, नेत्रदीपक विद्युत रोषणाई, इजिप्शियन, अमेरिकन, जापनीज, अरेबिक जादूचे चित्तथरारक प्रयोग पाहता येणार आहेत. कोल्हापूर, सांगलीतील प्रयोगावेळी काही कोरोना योद्ध्यांचा सत्कार केला जाणार आहे. या प्रयोगासाठी ऑनलाईन तिकीट नोंदणी सुरू आहे. या प्रयोगाचा प्रेक्षकांनी आनंद घ्यावा, असे आवाहन जितेंद्र रघुवीर आणि संयोजक मारूती गायकवाड, विकास पावसकर यांनी केले आहे.
फोटो (१००२२०२१-कोल-मॅजिक शो अनलॉक)