अवैध खैर वाहतूक करणारी टोळी अटकेत

पहाटे दोन वाजताची कारवाई ; एक लाखाचा मुद्देमाल जप्त

लोकमत न्यूज नेटवर्क

धामोड : धामोड - कोत - मानेवाडी मार्गावर एनारी (ता. वैभववाडी) येथील लाकूड व्यापाऱ्याला मध्यरात्री दोन वाजता म्हासुर्ली वनपाल व त्यांच्या पथकाने खैर लाकडाची अवैध वाहतूक करताना पकडले. मानेवाडी येथील एका वाहनचालकाला हाताशी धरून ही टोळी दुर्मीळ वनौषधींसह झाडांची चोरटी वाहतूक करत असल्याची माहिती वन विभागाला आठवडाभरापूर्वी मिळाली होती. त्यानुसार म्हासुर्ली वन विभागाच्या कर्मचाऱ्यांनी गुरुवारी मध्यरात्री सापळा रचला. यावेळी केलेल्या कारवाईत दोन आरोपींसह १ लाख ३,३२६ रुपयांचा मुद्देमाल जप्त करण्यात आला.

केळोशी व म्हासुर्ली या संरक्षित वनांमधून दुर्मीळ वनौषधींसह काही वृक्षांची तोड होत असल्याची माहिती वन विभागाला मिळाली होती. वैभववाडी तालुक्यातील एक टोळी स्थानिकांना पैशाचे आमिष दाखवून जाळ्यात ओढत असल्याची गोपनीय माहिती सुत्रांकडून वन विभागाला मिळाली होती. या माहितीच्या आधारे गुरुवारी मध्यरात्री २ वाजता वन विभागाने सापळा रचून ही कारवाई केली.

या कारवाईत मानेवाडी (ता. राधानगरी) येथील लहू रामचंद्र माने याच्या गाडीत बिगरपासचे खैराचे लाकूड सापडले. या गाडीतील खैराच्या १.०० घनमीटर जळावू लाकूड मालासह वाहनही जप्त करण्यात आले. याप्रकरणी वाहनमालक लहू रामचंद्र माने (रा. कोतेपैकी मानेवाडी) व लाकूड व्यापारी रामचंद्र साईल (रा.एनारी, ता. वैभववाडी) यांच्याविरुद्ध भारतीय वन अधिनियम १९२७ कलम ४१ (२) अन्वये प्रथम गुन्हा राशिवडे वनरक्षक उमा जाधव यांनी नोंदवला आहे. ही कारवाई आर. एस. तिवडे, दिनेश टिपुगडे, शिवाजी कांबळे, जोतिराम कवडे, संतोष करपे यांच्यासह उमा जाधव यांच्या पथकाने केली. पुढील तपास वनक्षेत्रपाल एस. बी. बिरासदर यांच्या मार्गदर्शनाखाली आर. एस. तिवडे करत आहेत.

फोटो ओळी : मानेवाडी - धामोड (ता. राधानगरी) मार्गावर खैराची अवैध वाहतूक करणाऱ्या वाहनचालक व व्यापाऱ्यावर वनपाल आर. एस. तिवडे व कर्मचाऱ्यांनी कारवाई केली.