कोल्हापूर : वाशी (ता.करवीर) येथील हाॅटेलमध्ये आॉर्डरप्रमाणे जेवण न दिल्याच्या रागातून अज्ञात चार जणांनी हाॅटेल व्यावसायिकास मारहाण केली. राजाराम रंगराव कांबळे (वय ४४, रा. म्हाडा काॅलनी, नवीन वाशी नाका) यांनी करवीर पोलीस ठाण्यात फिर्याद दिली. त्यानुसार अज्ञातांविरोधात गुन्हा नोंद झाला.
नंदवाळ फाट्याजवळ फिर्यादी कांबळे यांचे हाॅटेल राज आहे. या हाॅटेलमध्ये बुधवारी रात्री चाैघेजण जेवणासाठी आले होते. त्यात ऑर्डर दिल्याप्रमाणे मिळाले नाही. जेवणातील पदार्थ का संपला, अशी विचारणा करत फिर्यादीस मारहाण केली. यात ते जखमी झाले. यावेळी चाैघांनी हाॅटेलमधील प्लास्टिक खुर्च्यांची मोडतोड केली. करवीर पोलिसांनी फिर्यादीनुसार अज्ञात चारजणांविरोधात गुन्हा नोंद केला. तपास सहायक फौजदार पवार करत आहेत.
शेतीच्या कारणावरून सख्या भावास मारहाण
कोल्हापूर : वडिलोपार्जित शेती करायला का देत नाही. या कारणावरून झालेल्या वादातून एकाने सख्या भावास काठीने मारून जखमी केले. अजित रंगराव मडके (वय ५२, रा. उत्तरेश्वर पेठ, उमरावकर गल्ली) असे जखमीचे नाव आहे. दीपक रंगराव मडके (रा. उत्तरेश्वर) या संशयितावर लक्ष्मीपुरी पोलीस ठाण्यात गुन्हा नोंद झाला.
फिर्यादी व संशयित हे दोघे सख्ये भाऊ आहेत. त्यांची वडिलोपार्जित शेती सांगरूळ येथे आहे. सर्व शेती आपणास करायला दे. या कारणावरून दोघा भावांमध्ये वादावादी झाली. त्याचे पर्यावसन धाकट्या भावाने फिर्यादी अजित यांच्या डोक्यात चिव्याची काठी मारून लाथाबुक्यांनी मारहाण करत जखमी केले. ठार मारण्याची धमकीही दिली. याबाबत जखमी अजित यांनी दिलेल्या फिर्यादीनुसार संशयित दीपक याच्याविरोधात लक्ष्मीपुरी पोलिसांत गुन्हा नोंद झाला. या प्रकरणाचा तपास ठाणे अंमलदार मिलिंद नलवडे करीत आहेत.
शाहूपुरीतील बँकेतून मोबाईल लंपास
कोल्हापूर : शाहूपुरीतील बँकेतील मोबाईल संच अज्ञात इसमाने लंपास केला. याबाबतची फिर्याद मनोज प्रकाश गायकवाड (वय ३५, रा. सहारा रेसिडेन्सी, फुलेवाडी) यांनी शाहूपुरी पोलीस ठाण्यात दिली.
शाहूपुरीतील साईक्स एक्स्टेंशन येथील बँकेत कार्यालयीन कामकाजाकरीता ठेवण्यात आलेला मोबाईल संच अज्ञात इसमाने लंपास केला. ही घटना शुक्रवारी (दि.१२) दुपारी साडेबारा ते अडीच या दरम्यान घडली. याबाबत बँकेतर्फे फिर्याद गायकवाड यांनी शाहूपुरी पोलिसांत दिली. त्यानुसार अज्ञाताविरोधात गुन्हा नोंद झाला. ठाणे अंमलदार घोलप हे तपास करत आहेत.