प्रॅक्टिस ‘अ’ वर अर्धा डझन गोल

केएसए लीग फुटबॉल: पाटाकडील ‘अ’चे लीग विजेतेपद निश्चित, प्रॅक्टिस ‘ब’विरुद्ध उत्तरेश्वर बरोबरी

कोल्हापूर : ‘केएसए’ लीग फुटबॉल स्पर्धेतील आज, गुरुवारी झालेल्या सामन्यात पाटाकडील तालीम मंडळ ‘अ’ ने प्रॅक्टीस क्लब ‘अ’ वर तब्बल ६-० अशी मात करीत लीगचे विजेतेपद निश्चित केले. तर प्रॅक्टीस ‘अ’ विरुद्ध उत्तरेश्वर प्रासादीक वाघाची तालीम यांच्यातील सामना गोलशून्य बरोबरीत राहीला. छत्रपती शाहू स्टेडियमच्या हिरवळीवर सुरू असलेल्या ‘केएसए’ लीग फुटबॉल स्पर्धेतील दुपारच्या सत्रातील पहिला सामना पाटाकडील ‘अ’ विरुद्ध प्रॅक्टीस क्लब ‘अ’ यांच्यात झाला. प्रारंभापासून पाटाकडील ‘अ’च्या ओंकार जाधव , ऋषिकेश मेथे पाटील, रुपेश सुर्वे,प्रशांत नार्वेकर , संजय चिले यांनी आक्रमक खेळाचे प्रदर्शन करीत प्रॅक्टीस ‘अ’ वर दबाव निर्माण केला. ९ व्या मिनिटाला पाटाकडील‘अ’ च्या अक्षय मेथे-पाटीलने दिलेल्या पासवर प्रशांत नार्वेकरने हेडद्वारे गोल करीत १-० अशी आघाडी घेतली. प्रॅक्टीस‘अ’ कडून सामन्यात बरोबरी करण्याचे शर्थीचे प्रयत्न करण्यात आले. १८ व्या मिनिटाला प्रॅक्टीस ‘अ’ च्या महेश पाटीलने पाटाकडील‘अ’च्या ऋषिकेश मेथे-पाटीलला मोठ्या डी मध्ये अवैधरित्या अडविले. याबद्दल मुख्य पंचानी पाटाकडील‘अ’ला पेनॅल्टी बहाल करण्यात आली. त्यावर ओमकार जाधवने गोल करीत २-० अशी आघाडी वाढविली. ३० व्या मिनिटाला पाटाकडील‘अ’च्या प्रशांत नार्वेकरने वैयक्तिक दुसरा व संघाचा तिसरा गोल केला. प्रॅक्टीसकडून ओंकार पाटील, ऋषिकेश जठार, अविनाश शेट्टी, अभिनव साळोखे, निलेश सावेकर यांनी खोलवर चढाया करण्याचा प्रयत्न केला. मात्र, पाटाकडील‘अ’च्या बचावफळीपुढे त्यांचे काहीच चालले नाही. उत्तरार्धाच्या प्रारंभी पाटाकडील‘अ’च्या नियाज पटेलने दिलेल्या पासवर ऋषिकेश पाटीलने गोल नोंदवत आघाडी ४-० अशी वाढवली. ५८ व्या मिनिटाला पाटाकडील‘अ’च्या ओंकार जाधवने मैदानी गोल करीत ही आघाडी ५-० अशी आघाडी वाढविली. ७७ व्या मिनिटाला पाटाकडील‘अ’अक्षय मेथे-पाटीलच्या पासवर ऋषिकेश मेथे पाटीलने वैयक्तिक दुसरा व संघाचा ६ वा गोल करीत विजयावर शिक्कामोर्तब केले. दुसरा सामना प्रॅक्टीस क्लब ‘ब’ विरुद्ध उत्तरेश्वर प्रासादीक तालीम मंडळ यांच्यात झाला. या सामन्यात दोन्ही संघानी बचावत्मक पवित्रा घेत गोल करण्याचे प्रयत्न केले. उत्तरेश्वरकडून सिद्धार्थ शिंदे, ओंकार लोकरे, स्वराज्य पाटील, मसूद मुल्ला यांनी तर प्रॅक्टीस ‘ब’ कडून प्रथमेश यादव, सौरभ हारुगले, राहूल गाडेकर यांनी गोल करण्याचे अनेक प्रयत्न केले. उत्तरेश्वरचा गोलरक्षक शिवम साळोखे याने,तर प्रॅक्टीस क्लब ‘ब’कडून गोलरक्षक अमोल पसारे यांनी उत्कृष्ट गोलरक्षण करीत उपस्थितांची वाहवा मिळवली. अखेरपर्यंत सामना गोलशून्य बरोबरीत राहीला. समर्थकांकडून जल्लोषपाटाकडील ‘अ’ने लीग स्पर्धेत सहाव्या फेरीअखेर सहा सामन्यात चार विजय, एक पराभव, एक बरोबरी, ३ गोल घेतले, तर १५ गोल प्रतिस्पर्धी संघावर केले असून सर्वाधिक १३ गुण पटकावले आहेत. बाकीच्या संघाचे सातव्या फेरीअखेर विजय मिळवला तरी १२ गुण होणार आहेत. त्यामुळे सहाजिकच पाटाकडील ‘अ’ने गुणांवर आघाडी घेत लीग विजेतेपदावर आजच शिक्कामोर्तब केल. सामना संपताच समर्थकांनी फटाके वाजवून आनंद व्यक्त केला. कोल्हापुरातील शाहू स्टेडियम येथे सुरू असलेल्या ‘केएसए’ लीग फुटबॉल स्पर्धेत गुरुवारी पाटाकडील ‘अ’ विरुद्ध प्रॅक्टिस क्लब ‘अ’ यांच्यात झालेल्या सामन्यातील एक क्षण.