कोल्हापूर : ‘पाडव्याची गुढी आणि पावसाची उडी’ या पारंपरिक म्हणीची प्रचीती मंगळवारी कोल्हापूरकरांनाही आली. गुढी उतरवण्याच्या वेळेस विजांच्या कडकडाटासह आलेल्या वळवाच्या पावसाने अक्षरश: झोडपून काढले. लॉकडाऊनच्या भीतीने आणि पाडव्याच्या खरेदीसाठी बाहेर पडलेल्यांचीही पावसाने चांगलीच फजिती केली.
गेल्या चार दिवसांपासून वळिवाच्या पावसाने जिल्ह्यात मुक्कामच ठोकला आहे. दुपारनंतर पाऊस येणार हे ठरलेलेच आहे. मंगळवारीदेखील सकाळपासून प्रचंड उष्मा जाणवत होता. दुपारनंतर जिल्ह्यातील बहुतांश भागात सरी कोसळण्यास सुरुवात झाली. शहरात साडेपाच वाजताच पाऊस सुरू झाला. सुरुवातीला हलक्या वाटणाऱ्या सरींनी नंतर मात्र चांगलाच जोर धरला.
उद्यापासून लॉकडाऊन लागेल या भीतीने खरेदीसाठी लोक दुपारपासून घरातून बाहेर पडले होते. पाडवा असल्याने खरेदीचा मुहूर्त साधायचा म्हणूनही लोक सहकुटुंब खरेदीसाठी बाहेर पडले होते. कोरोनाचे निर्बंध असतानाही लोकांनी खरेदीसाठी गर्दी केली होती. पोलीस प्रशासनाकडून निर्बंधाची वारंवार आठवण करून दिली तरी लोक ऐकत नव्हते; पण संध्याकाळी आलेल्या पावसाने एका दमात सर्वांना घरात बसवले. खरेदीच्या उत्साहावरही पाणी पडल्याने विक्रेत्यांचा मात्र हिरमोड झाला.
चौकट ०१
फेरीवाल्यांची दैना
वळवाचा पाऊस पाठ सोडत नसल्याने सुरुवातीचा आनंद आता वैतागात परावर्तित झाला आहे. रोज संध्याकाळी न चुकता पाऊस पडत असल्याने कामे दुपारपर्यंत आटोपून घ्यावी लागत आहेत. फळ विक्रेते फेरीवाल्यांची फजिती होत आहे. एकतर माल वेळेत मिळत नाही, मिळाला तरी निर्बंधामुळे वेळेत विक्री होत नाही. त्यात पावसाची भर पडत असल्याने माल कुजून तोटा वाढला आहे.
चौकट ०२
ज्वारी काळी पडली, उसाला संजीवनी
सलग पाऊस पडत असल्याने काढणीस आलेली ज्वारी, मका, बाजरी आता काळी पडू लागली आहे. काढणीस आलेला मूग, उडीद यालाही मोड येऊ लागले आहे. उन्हाळी भात, नाचणी, भुईमूग यांची फूलगळ वाढली आहे. आडसाली लागणी असलेल्या उसाची उंची जास्त असल्याने तो वारा आणि पावसाच्या माऱ्यावर जमिनीवर लोळू लागला आहे. पूर्वहंगामी, सुरूच्या लागणी व खोडव्यासाठी मात्र हा पाऊस संजीवनी बनून आला आहे. या पावसामुळे या उसाची जोमदार वाढ होणार आहे.
फोटो: १३०४२०२१-कोल- रेन ०१, ०२
फोटो ओळ:
कोल्हापुरात सलग चौथ्या दिवशी मंगळवारी संध्याकाळी वळवाच्या पावसाने हजेरी लावली. गुढीपाडव्याच्या खरेदीचा उत्साह सुरू असताना आलेल्या या पावसाने नागरिकांची फजिती केली. पावसात भिजू नये म्हणून खरेदीसाठी आणलेली पिशवीच डोक्यावर धरून घर गाठावे लागले. (छाया : नसीर अत्तार)