गडहिंग्लज :
केंद्र शासनाच्या ग्रामीण विकास मंत्रालयातर्फे पंचायत समिती सशक्तीकरण अभियानांतर्गत झालेल्या स्पर्धेत कोल्हापूर जिल्ह्यातील गडहिंग्लज पंचायत समितीने राज्यात प्रथम क्रमांक पटकावला. अहमदनगर जिल्ह्यातील ‘राहाता’ पंचायत समितीला दुसरा क्रमांक मिळविला.
जानेवारी, २०२१ मध्ये राज्यस्तरावरील कोकण विभागीय समितीने गडहिंग्लज पंचायत समितीच्या कामांची पाहणी केली होती. या यशाबद्दल गडहिंग्लज पंचायत समितीला २५ लाखांचे बक्षीस आणि सन्मानपत्र देऊन पंडित दीनदयाळ उपाध्याय पुरस्काराने गौरविण्यात येणार आहे.
केंद्र व राज्य शासनाच्या विविध योजनांची अंमलबजावणी, रोजगार हमी योजना, समाजकल्याण, स्वच्छता अभियान, आरोग्य विभागाकडील योजना, राष्ट्रीय पेयजल योजनांसह सर्व विभागातर्फे राबविलेल्या योजना व कामांची पाहणी करून समितीने मूल्यांकन केले होते.
यापूर्वी गडहिंग्लज पंचायत समितीने राज्यस्तरावरील ‘यशवंत पंचायत राज’ स्पर्धेत राज्यात दुसरा क्रमांक मिळविला आहे. त्यापाठोपाठ केंद्राच्या पुरस्कारामुळे पंचायत समितीच्या शिरपेचात आणखी एक मानाचा तुरा खोवला गेला आहे.
याकामी सभापती रूपाली कांबळे, उपसभापती इराप्पा हसुरी यांच्यासह सर्व सदस्य, गटविकास अधिकारी शरद मगर, खातेप्रमुख व कर्मचारी यांनी विशेष परिश्रम घेतले.
-------------------------
* ५ वर्षांत दुसऱ्यांदा यश..! यापूर्वी २०१४-१५ मध्येही या स्पर्धेत गडहिंग्लज पंचायत समितीला राज्य पातळीवर पहिला क्रमांक मिळाला होता. पाच वर्षांनंतर राज्य पातळीवरील या स्पर्धेतील यशाची पुनरावृत्ती झाली आहे.
--------------------
* ग्रामविकासमंत्री हसन मुश्रीफ यांचे सहकार्य, लोकप्रतिनिधी, पदाधिकारी व सदस्यांच्या सक्रिय सहभागामुळे शासनाच्या सर्व योजनांची अंमलबजावणी सहजपणे करता आली. त्याचे सादरीकरणही उत्तमरीत्या केले. सर्वांचे सहकार्य व सक्रिय सहभागामुळेच हा पुरस्कार प्राप्त झाला आहे.
- शरद मगर, गटविकास अधिकारी, गडहिंग्लज पंचायत समिती.
---------------------------
* गडहिंग्लज पंचायत समिती : ०२०४२०२१-गड-१०