कोल्हापूर : कोल्हापूर ते गगणबावडा मार्गावर सैतवडे फाटा येथे भरधाव ट्रक रस्त्याकडेच्या झाडावर धडकून झालेल्या अपघातात तीन वर्षांच्या बालिकेसह पाच जण गंभीर जखमी झाले. ही दुर्घटना बुधवारी सायंकाळी घडली. जखमींना तातडीने रुग्णवाहिकेतून कोल्हापुरात सीपीआर रुग्णालयात उपचारासाठी दाखल केले.
जखमींची नावे अशी : सुरेश कुमार कोकाटे (वय ३०), अनिता सुरेश कोकाटे (२७), प्रकाश सखाराम लांबोरे (४०), प्राजक्ता प्रकाश लांबोरे (३८), सृष्टी प्रकाश लांबोरे (वय ३, सर्व रा. कातळी, ता. गगणबावडा).
पोलिसांनी दिलेली माहिती अशी की, गगणबावडाहून कोल्हापूरकडे भरधाव वेगाने ट्रक येत होता. त्याचवेळी समोर आलेल्या मोटारीला चुकवण्याच्या प्रयत्नात चालक सुरेश कोकाटे याचा ट्रकवरील ताबा सुटला व ट्रक रस्त्याच्या कडेला झाडावर आदळला. या दुर्घटनेत ट्रकच्या केबिनमधील पाच जण गंभीर जखमी झाले, त्यांना १०८ रुग्णवाहिकेने तातडीने कोल्हापूरच्या ‘सीपीआर’मध्ये उपचारासाठी दाखल केले. या अपघातात ट्रकच्या केबिनचे मोठे नुकसान झाले. अपघातानंतर जखमींच्या नातेवाईकांनी सीपीआर रुग्णालयात मोठी गर्दी केली होती.