कोल्हापूर : कोरोनाच्या कचाट्यात अडकल्यामुळे नऊ महिन्यांपूर्वी ठरलेला विवाहसोहळा अखेर मोबाईल लाईव्हचा आधार घेत या महिन्यात पार पडला. कोल्हापूरचा मुलगा आणि पंढरपूरची मुलगी यांच्या अमेरिकेत पार पडलेल्या या अनोख्या विवाहसोहळ्यात महाराष्ट्रातील वऱ्हाडी मंडळी त्यांच्या त्यांच्या गावातूनच सहभागी झाली आणि नातेवाईक, मित्रमंडळींनी मोबार्ईल लाईव्हद्वारेच ऑनलाईन अक्षता टाकून त्यांना शुभेच्छा दिल्या.
कोल्हापुरातील योगेश कुंभार यांचा मुलगा अभिषेक आणि पंढरपूर तालुक्यातील वाडीकुरोली येथील उत्तम कुंभार यांची कन्या स्मिता यांचा विवाह सर्वसंमतीने मार्च २०२० मध्ये निश्चित झाला होता. दोघेही उच्चशिक्षित आहेत. अभिषेक हा अमेरिकेतील एका कंपनीत नोकरी करतो. कोरोनाची परिस्थिती दूर झाल्यानंतर भारतात विवाह समारंभ करण्याचे ठरले. विवाहाचा शुभमुहूर्तही काढण्यात आला; परंतु कोरोनामुळे अभिषेकला भारतात जाण्याची परवानगी मिळाली नाही. विवाह निश्चित होऊन नऊ महिने उलटले तरी त्याला भारतात येण्याची परवानगी मिळाली नाही. अखेर दोन्हींकडच्या नातेवाइकांनी अमेरिकेतच जाण्याचे ठरवले.
सर्वांनी पासपोर्ट तयार केले आणि व्हिसा मंजूर होण्याच्या प्रतीक्षेत सर्वजण होते. मुहूर्त तर काढलेला, समारंभासाठी हॉलही ठरलेला होता. सर्व तयारी पूर्ण झाली असतानाच अमेरिकेने व्हिसा नाकारल्याने पुन्हा खो बसल्याने सारेच हताश झाले. शेवटी वऱ्हाडी मंडळींशिवाय मुलीने एकटीनेच जाण्याचे ठरविले आणि विमानाने ती अमेरिकेत पोहोचली. सनईच्या निनादात आणि भटजींच्या मंगलाष्टकांनी ठरल्याप्रमाणे मोजक्याच मित्रमैत्रिणींच्या उपस्थितीत अखेर हे शुभमंगल निर्विघ्नपणे पार पडले. या अनोख्या विवाहसोहळ्यात महाराष्ट्रातील वऱ्हाडी मंडळी त्यांच्या-त्यांच्या गावांतूनच सहभागी झाली आणि नातेवाइकांनी तसेच मित्रमंडळींनी मोबार्ईल लाईव्हद्वारेच अक्षता टाकून त्यांना शुभेच्छा दिल्या.
----------------------------------------------------------------
फोटो : कोल्हापुरातील योगेश कुंभार यांचा मुलगा अभिषेक आणि पंढरपूर तालुक्यातील वाडीकुरोली येथील उत्तम कुंभार यांची कन्या स्मिता अमेरिकेत विवाहबद्ध झाले.
फोटो ओळ : 22042021-kol-online marrige
(बातमीदार : संदीप आडनाईक)
===Photopath===
220421\22kol_4_22042021_5.jpg
===Caption===
फोटो : कोल्हापूरातील योगेश कुंभार यांचा मुलगा अभिषेक आणि पंढरपूर तालुक्यातील वाडीकुरोली येथील उत्तम कुंभार यांची कन्या स्मिता अमेरिकेत विवाहबध्द झाले. फोटो ओळ : 22042021-kol-online marrige