(जिल्हा बँक लोगो)
लोकमत न्यूज नेटवर्क
कोल्हापूर : अडकूर (ता. चंदगड) येथील अडकूर विकास संस्थेत डिसेंबर २०१८ मध्ये सचिव व लिपिकाने बोगस रेकॉर्डद्वारे लाखो रुपयांचा अपहार केला होता. बँकेचे उपनिरीक्षक असतानाही या अपहाराकडे दुर्लक्ष केल्याचा ठपका ठेवत बँकेने दादू हसन मुल्ला यांना अखेर बडतर्फ केले.
अडकूर विकास संस्थेचे सचिव व लिपिकाने बोगस सभासदांचे नावे रक्कम उचल क,न लाखो रुपयांचा अपहार केला होता. वास्तविक पीककर्जासह इतर कर्जपुरवठा करताना जिल्हा बँकेचे निरीक्षक त्याच्या कागदपत्रांची तपासणी करतात. त्यानंतर मंजुरी दिली जाते. या संस्थेचे उपनिरीक्षक दादू मुल्ला यांनी संस्थेत बोगस कागदपत्रांच्या आधारे अपहार होत असताना त्याकडे दुर्लक्ष केल्याचा ठपका ठेवत बँकेने त्यांच्यावर डिसेंबर २०१८ मध्ये निलंबनाची कारवाई केली होती. मुल्ला यांच्या निष्काळजीपणा व बेजबाबदारपणामुळे बँकेला आर्थिक तोषीस लागल्याने २४ डिसेंबर २०१८ ला त्यांची खातेनिहाय चौकशी करण्याचे आदेश कार्यकारी समितीने दिले. चाैकशीमध्ये मुल्ला यांच्या निष्काळजीपणामुळेच अपहार करण्यास मदत झाल्याचा ठपका ठेवण्यात आला आहे. बँकेच्या शिस्तीस बाधा आणणारे वर्तन केल्याने त्यांना बडतर्फ करण्याचा निर्णय जिल्हा बँकेने घेतला आहे.
अपहारानंतर अडीच वर्षांनी कारवाई
अडकूर संस्थेत डिसेंबर २०१८ मध्ये अपहार झाला होता. त्यांनतर मुल्ला यांना निलंबित केले असले तरी मुल्ला यांच्या खातेनिहाय चौकशीचे आदेश मे २०१९ ला देण्यात आले. त्यानंतर मार्च २०२० मध्ये खातेनिहाय चौकशी पूर्ण होऊन सप्टेंबर २०२० ला अहवाल बँकेकडे सादर केला आणि आता बडतर्फची कारवाई केली. अपहारानंतर अडीच वर्षांनी कारवाई झाली.