नाताळची तयारी वेगात

शहरातील वायल्डर मेमोरियल चर्चसह अन्य चर्चमध्ये सजावटीच्या रंगरंगोटीच्या कामाने वेग घेतला आहे़

कोल्हापूर : ख्रिस्त बांधवांच्या परमोच्च आदराचे प्रतीक असलेला नाताळ सण अवघ्या चार दिवसांवर येऊन ठेपला आहे़ नाताळ हा प्रभू येशूंचा जन्मदिवस असल्यामुळे शहरातील ख्रिस्त बांधवांच्या उत्साहाला उधाण आले आहे़ या पार्श्वभूमीवर शहरातील बाजारपेठांमध्ये ख्रिसमस ट्री, केक आणि डोनट तसेच फराळ आणि कपड्यांच्या खरेदीसाठी ख्रिस्त बांधवांचा उत्साह टिपेला जात आहे़ शहरातील वायल्डर मेमोरियल चर्चसह अन्य चर्चमध्ये सजावटीच्या रंगरंगोटीच्या कामाने वेग घेतला आहे़नाताळनिमित्त मिठाई आणि विद्युतरोषणाईसाठी लागणाऱ्या विविध वस्तूंच्या खरेदीसाठी बाजारपेठा सज्ज झाल्या आहेत़ विविध आकाराच्या रंगीबेरंगी विद्युत माळा, नाताळाच्या शुभेच्छा देणारे विविध आकाराचे केक शहरातील बेकरीमध्ये उपलब्ध आहेत़ ख्रिस्त बांधवांनी आपआपल्या घरीच फराळ तयार करण्यासाठी फराळासाठी लागणारे विविध पदार्थ खरेदी केले आहेत़नाताळला अवघे काही दिवस राहिल्याने शहरातील चर्च तसेच ख्रिस्त बांधवांच्या उत्साह वाढला आहे. शालेय विद्यार्थी आणि विद्यार्थिनीही न चुकता सायंकाळी चर्चमध्ये प्रार्थनेसाठी जमत आहेत़ महापालिकेजवळील चर्चमध्ये प्रभू येशूची प्रार्थना, संदेश आणि उपासना कार्यक्रमांचे आयोजन करण्यात आले आहे़ येथील सेंट झेव्हियर्स स्कूलमध्ये नाताळ सणानिमित्त विविध कार्यक्रमांचे आयोजन करण्यात आले आहे. सांताक्लॉझचे मुलांना मोठे आकर्षण असून, त्याबाबतची उत्सुकता शिगेला पोहोचली आहे. हा सण बच्चेकंपनीचा आनंद द्विगुणीत करणारा आहे. न्यू शाहूपुरीमधील वायल्डर मेमोरियल चर्चमध्ये आकर्षक विद्युत रोषणाई करण्यात आली आहे. ही नयनरम्य रोषणाई सर्वांचे लक्ष वेधून घेत आहे.नाताळच्या शुभेच्छा देणारी पत्रेही बाजारात दाखल झाली आहेत. नाताळ सणानिमित्त ख्रिस्त बांधव खरेदी करण्यात दंग झाले आहेत. त्यामुळे शहरातील बाजारपेठा गर्दीने फुलून गेल्या आहेत. सर्वत्र नाताळ सणाचा माहोल पहायला मिळत आहे. (प्रतिनिधी)