जयसिंगपूर बसस्थानकात सीसीटीव्ही कॅमेरे बंद

संदीप बावचे : जयसिंगपूर येथील बसस्थानकावर चोरट्यांचा वावर मोठ्या प्रमाणात वाढला आहे. महिला प्रवाशांच्या दागिन्यांवर वारंवार डल्ला मारण्याचे प्रकार घडत आहेत. त्यामुळे बसस्थानकावरील प्रवाशांची सुरक्षा रामभरोसे राहिली आहे. नवीन बसस्थानकाच्या बांधकामामुळे सीसीटीव्ही कॅमेरे बंद अवस्थेत आहेत. त्यामुळे चोरट्यांना फावले असून जयसिंगपूर पोलिसांनी चोरट्यांचा बंदोबस्त करावा, अशी मागणी प्रवासीवर्गातून होत आहे.

राज्य परिवहन महामंडळाच्यावतीने दोन वर्षांपूर्वी प्रवाशांच्या सुरक्षिततेसाठी शहरातील क्रांती चौकाशेजारी असणाऱ्या मध्यवर्ती बसस्थानकात पाच सीसीटीव्ही कॅमेरे बसविले होते. या कॅमेऱ्यांमुळे बसस्थानक आवारातील हालचालींवर लक्ष ठेवले जात होते. बसस्थानक परिसरात प्रवाशांना लुटालुटीच्या आणि चोरीच्या घटनांवर कॅमेऱ्यांमुळे आळा बसला होता. एखाद्या घटनेविषयी तातडीने प्रवाशांना फुटेज पहायला मिळत होते.

दरम्यान, नव्याने बसस्थानकाचे बांधकाम सुरू झाल्याने सीसीटीव्ही कॅमेरे बंद करण्यात आले आहेत. याचाच फायदा चोरटे घेत असून चोरीच्या घटनेत मोठ्या प्रमाणात वाढ झाली आहे. कुरुंदवाड येथील वृद्धेचे ५० हजार रुपये किमतीचे सोन्याचे गंठण, जयसिंगपूर येथील महिलेचे एक तोळ्याचे सोन्याचे मंगळसूत्र चोरीला गेल्याची घटना ताजीच आहे. दागिने चोरीच्या प्रकारामुळे महिलावर्गातून भीती व्यक्त होत आहे. विशेष म्हणजे चोरट्यांनी महिला प्रवाशांना टार्गेट केले आहे. बसमध्ये चढत असताना चोरीचा हा प्रकार घडत असल्याने महिलांनी सावधगिरी बाळगणे गरजेचे बनले आहे. बसस्थानकात वाहतूक नियंत्रण कक्षाबरोबर उजव्या बाजूला जुनाच फलाट आहे. त्यामुळे तीन कॅमेरे सध्या सुरू करता येतात. कुरुंदवाड आगारप्रमुखांनी सीसीटीव्ही कॅमेरे सुरू करावेत, अशी मागणी प्रवासीवर्गातून होत आहे.

---------------- कोट - बसस्थानकाच्या बांधकामामुळे सीसीटीव्ही कॅमेऱ्यासाठी लावण्यात आलेले वायरिंग काढून ठेवण्यात आले आहेत. त्यामुळे सध्या बसस्थानक आवारात कॅमेरे बंद आहेत.

- किशोर शिंगाडे, वाहतूक नियंत्रण कर्मचारी कोट - बसस्थानकावरून जयसिंगपूरसह ग्रामीण भागातील प्रवासी ये-जा करतात. महिलांच्या पर्समधील अथवा गळ्यातील दागिने चोरी होत असल्याने पोलिसांनी याठिकाणी बंदोबस्त ठेवावा.

- सुरेश शिंगाडे, सामाजिक कार्यकर्ते

फोटो - ३००१२०२१-जेएवाय-०३

फोटो ओळ - जयसिंगपूर येथील बसस्थानकावर प्रवाशांची मोठी गर्दी असते.