दत्ता बिडकर
हातकणंगले : पंचायत समितीच्या सभापती निवडीसाठी २२ जानेवारीस दुपारी २ वाजता तहसीलदार डॉ. प्रदीप उबाळे यांच्या अध्यक्षतेखाली विशेष सभेचे आयोजन केले आहे.
सभापती पदासाठी नाटयमय घडामोडी सुरू असून भाजपाचे सहा, जनसुराज्यचे पाच, शिवसेना दोन, स्वाभिमानी दोन, काँग्रेस एक आणि अपक्ष एक अशा १७ सदस्यांनी एकत्र येऊन सभापती निवडण्याचा निर्णय घेतला आहे. भाजपाचे उत्तम सावंत ( नागाव ) आणि जनसुराज्यचे डॉ. प्रदीप पाटील (टोप) यांच्यामध्ये रस्सीखेच सुरू आहे.
हातकणंगले पंचायत समितीमध्ये कोणत्याही पक्षाला स्पष्ट बहुमत नाही. २०१७ च्या निवडणुकीमध्ये भाजपा - ६, जनसुराज्य - ५, आवाडे यांची ताराराणी आघाडी - ५, शिवसेना - २, स्वाभिमानी शेतकरी संघटना - २, काँग्रेस -१, आणि अपक्ष - १ अशी त्रिशंकू सभागृहाची स्थिती होती. पहिल्या सभापती पदासाठी भाजपा आणि जनसुराज्यचे ११ सदस्य एकत्र आले. काँग्रेसचा एकमेव सद्स्य गैरहजर राहिला. त्यावेळी भाजपाच्या रेश्मा सनदी (कबनूर) या सव्वा वर्षासाठी सभापती झाल्या. दुसऱ्यावेळी भाजपाने जनसुराज्यला साथ दिली आणि जनसुराज्यच्या सरितादेवी मोहिते (घुणकी) या सभापती झाल्या.
अडीच वर्षानंतर सभापती पदाचे आरक्षण सर्वसाधारण झाले. आवाडे यांच्या ताराराणी आघाडीने आपले- ५, शिवसेना - २, स्वाभिमानी - २, काँग्रेस - १ अपक्ष - १ आणि भाजपचा एक सदस्य फोडून आवाडे गटाचे महेश पाटील (चंदूर) सभापती झाले, तर काँग्रेसचे एकमेव सदस्य राजू भोसले ( नरंदे ) उपसभापती झाले. आवाडे गटाचे महेश पाटील यांनी मुदतीत राजीनामा दिला नाही, म्हणून त्यांच्याविरुद्ध सर्व सद्स्य एकत्र आले आणि अविश्वास ठराव दाखल केला. आता राजकीय घडामोडी सुरू झाल्या.
सभापती पदासाठी पुन्हा एखादा एकमेकाविरुद्ध आवाज उठवणारे, सभागृहामध्ये लढणारे एकत्र आल्याचे चित्र असून जिल्ह्याच्या राजकारणापलीकडचे राजकारण सुरू आहे. भाजपा, जनसुराज्य, शिवसेना, काँग्रेस, स्वाभिमानी आणि अपक्ष असे १७ सदस्य एकत्र आले असून २२ जानेवारी रोजी भाजपा आणि जनसुराज्यचा सभापती करण्यासाठी नेतेमंडळी सरसावली आहेत.
ताराराणी आघाडीला वगळणार
प्रकाश आवाडे गटाच्या ताराराणी आघाडीचे ५ सदस्य वगळून भाजपा, जनसुराज्य, शिवसेना, काँग्रेस, स्वाभिमानी शेतकरी संघटना आणि अपक्ष असे १७ सदस्य एकत्र आल्याने तालुक्याच्या राजकारणामध्ये भूकंप होण्याची शक्यता आहे.