कोल्हापूर : कोरोनाबरोबर संभाव्य पूरपरिस्थितीचा सामना करण्यासाठी महानगरपालिका प्रशासनाने सज्ज राहावे, असे आवाहन आमदार चंद्रकांत जाधव यांनी केले.
संभाव्य पूरपरिस्थितीच्या नियोजनासाठी आयोजित दक्षता बैठकीत ते बोलत होते. महानगरपालिकेच्या निवडणूक कार्यालयात ही बैठक झाली. यावेळी महानगरपालिकेच्या प्रशासक डॉ. कादंबरी बलकवडे उपस्थित होत्या.
कोरोनाबरोबर संभाव्य पूरपरिस्थितीचा सामना करण्यासाठी प्रशासनाने सज्ज राहणे गरजेचे आहे. पूर्वनियोजन असेल तरच कोरोना व संभाव्य पूरस्थिती अशा दोन आपत्तींच्या आघाडीवर लढताना प्रशासन, आपत्ती व्यवस्थापन यंत्रणा व नागरिकांची तारांबळ टाळता येणे शक्य असल्याचे आमदार जाधव म्हणाले.
कळंबा तलाव भरला तर ओढयातील पाण्याला फुग येऊन जरगनगर, रामानंद नगर भागातील काही घरात पाणी जाते, हे टाळण्यासाठी शहरातील सर्व ओढे व नाल्यांची साफसफाई करून घ्यावी. ज्या छोट्या नाल्यात जेसीबी जात नाहीत तेथे छोटे जेसीबी किंवा कर्मचाऱ्यामार्फत स्वच्छता करून घ्यावी. धोकादायक झाडे, फांद्या पावसाळ्यापूर्वी तोडावीत. जीवित व वित्तहानी टाळण्यासाठी धोकादायक इमारतीची पाहणी करून, नागरिकांना सूचना द्याव्यात, अशा सूचना आमदार जाधव यांनी दिल्या.
बालिंगा पंपिंग स्टेशन उंचावर घेण्यात येत आहे. त्याठिकाणी सबमर्सिबल व व्हर्टिकल पंप बसविण्यात आले आहेत. त्यामुळे पूरपरिस्थितीमध्येही शहराचा पाणीपुरवठा सुरळीत राहणार असल्याचे प्रशासक डॉ. बलकवडे यांनी सांगितले.
यावेळी अतिरिक्त आयुक्त नितीन देसाई, प्रभारी शहर अभियंता नारायण भोसले, उपशहर अभियंता एन. एस. पाटील, हर्षजीत घाटगे, बाबूराव दबडे, जल अभियंता एन. एस. साळोखे, आपत्ती व्यवस्थापक रणजित चिले, ड्रेनेज चॅनेल सफाई स्वप्नील उलपे, समीर व्याघ्रंबरे, आदी उपस्थित होते.
फाेटो क्रमांक - १२०५२०२१-कोल-केएमसी मिटींग
ओळ - कोल्हापूर शहरातील संभाव्य पूरपरिस्थितीसंदर्भात आमदार चंद्रकांत जाधव व प्रशासक डॉ. कादंबरी बलकवडे यांच्या उपस्थितीत बुधवारी बैठक झाली. यावेळी महापालिकेचे सर्व अधिकारी उपस्थित होते.