(बाजार समिती लोगो)
लोकमत न्यूज नेटवर्क
कोल्हापूर : कोरोनाच्या वाढत्या संसर्गाच्या पार्श्वभूमीवर कोल्हापूर शेती उत्पन्न बाजार समितीमध्ये आज (सोमवार)पासून समितीने दिलेला पास पाहूनच प्रवेश दिला जाणार आहे. त्याचबरोबर अडते, व्यापाऱ्यांसह हमाल, तोलाईदारांचीही ॲन्टिजन चाचणी केली जाणार आहे.
राज्यात लॉकडाऊन असले तरी भाजीपाल्यासह अत्यावश्यक सेवा सुरूच आहे. भाजीपाला, फळांसह इतर खरेदी-विक्री सुरू आहे. कोल्हापूर बाजार समितीत रोज परजिल्ह्यातून मोठ्या प्रमाणात शेतीमाल येतो. त्याच्या खरेदीसाठी व्यापाऱ्यांची गर्दी होते. त्यात इतर व्यवसाय बंद असल्याने भाजीपाला विक्रेत्यांची संख्या वाढली आहे. त्यामुळे सकाळच्या सत्रात सौद्यावेळी गर्दी हाेत आहे. यातून कोरोनाचा संसर्ग वाढण्याचा धोका आहे. समिती प्रशासनाने सौद्यावेळी होणारी गर्दी लक्षात घेऊन यापूर्वीच खबरदारी घेतली आहे. सॅनिटायझर, सुरक्षित अंतर ठेवण्याबाबतची जनजागृती, आदी बाबी केल्या आहेत. तरीही गर्दी आटोक्यात येत नाही. यासाठी समितीने खरेदीदार व व्यापाऱ्यांना भाजीपाला, फळे खरेदीसाठी येताना प्रवेश पास दिला आहे. तो पाहूनच त्यांना आत सोडले जाणार आहे. हा पास नसणाऱ्यांना कोणत्याही परिस्थितीत प्रवेश दिला जाणार नाही.
महापालिका, बाजार समिती व पोलीस प्रशासनातर्फे भाजीपाला मार्केटमधील व्यापारी, अडते, खरेदीदार, हमाल व तोलाईदारांची ॲन्टिजन चाचणी करण्यात येणार असल्याची माहिती बाजार समितीचे सचिव जयवंत पाटील यांनी दिली.
‘आरटीपीसीआर’ चाचणीत अनेकजण पॉझिटिव्ह
कोरोनाचा संसर्ग रोखण्यासाठी समिती आवारात येणाऱ्यांची दोन दिवसांपूर्वी आरटीपीसीआर चाचणी करण्यात आली. त्यामध्ये अनेकजण पॉझिटिव्ह सापडल्याने खळबळ उडाली होती.