शिरसोली प्र. बो. येथील ग्रामपंचायत कार्यालयाच्या इमारतीचे काम २०१९-२० या वर्षात नव्यानेच झाले असून गेल्या तीन महिन्यांपूर्वीच या इमारतीचे उद्घाटन राज्याचे पाणीपुरवठामंत्री तथा पालक मंत्री गुलाबराव पाटील यांच्या हस्ते झाले आहे. ग्रामपंचायत इमारत नवीन असली तरी या इमारतीच्या स्लॅबचे प्लास्टर वेगवेगळ्या ठिकाणी सहा महिन्यांत चार वेळा कोसळले आहे व लागलीच डागडुजीही करण्यात आली असली तरी पुन्हा प्लास्टर कोसळल्याने खळबळ उडाली आहे.
सोमवारी सकाळी अकरा वाजता ग्रामपंचायत कार्यालयात संगणक कक्षात कर्मचारी श्रीकांत बारी, चिंधू बारी व रोहिदास तायडे हे काम करीत असताना अचानक स्लॅबच्या प्लास्टरचा भाग कोसळला. दैवबलवत्तर म्हणून या कर्मचाऱ्यांचे प्राण वाचले आहेत. संबंधित प्लास्टर पुन्हा पुन्हा ढासाळत असल्याने ग्रामपंचायत कर्मचारी व ग्रामस्थांमध्ये भीतीचे वातावरण पसरले असून या प्रकाराने गावात खळबळ उडाली आहे.
----------------
अधिकारी, ठेकेदार यांच्या चौकशीची मागणी
ग्रामपंचायत इमारतीच्या कामाला दोनच वर्षे झाले असले तरी अशा घटना पुन्हा पुन्हा घडत असून मोठी दुर्घटना घडण्याची शक्यता नाकारता येत नसल्याने निकृष्ट दर्जाचे काम करणाऱ्या ठेकेदार व इमारतीचे मूल्यांकन करणाऱ्या अधिकाऱ्याची चौकशी करावी, अशी मागणी ग्रामस्थांतून केली जात आहे.