दीपनगर – प्रकल्प बाधित तरुणांना रोजगार उपलब्ध करून देण्यासाठी पुन्हा दीपनगर येथील ६६० मेगावॅट प्रकल्प कार्यालयात शिवसेना पदाधिकारी धडकले. यावेळी संबंधित तरुणांना रोजगार उपलब्ध करून द्यावा अशी मागणी करण्यात येऊन संबंधित अधिकाऱ्यांना आठ दिवसाचा अल्टिमेटम देण्यात आला आहे. आठ दिवसात संबंधितांनी रोजगार उपलब्ध करून न दिल्यास प्रकल्पाच्या कामास कुलूप ठोकण्याचा इशारा देण्यात आला.
याबाबत अधिक माहिती अशी की, दोन दिवसापूर्वी वेल्हाळेसह परिसरातील प्रकल्प बाधित अनेक बेरोजगारांनी शिवसेना जिल्हाप्रमुख समाधान महाजन यांच्या निवासस्थानी येऊन चर्चा करीत निवेदन दिले होते. त्यावेळेस त्यांनी प्रकल्पाचे मुख्य अभियंता विवेक रोकडे यांच्याशी दूरध्वनीवर चर्चा केल्याप्रमाणे बुधवार रोजी सायंकाळी पाच वाजता सर्व बेरोजगार तरुण व शिवसेनेचे जिल्हाप्रमुख समाधान महाजन , कार्यालयीन उपजिल्हाप्रमुख प्रा. उत्तम सुरवाडे, विधानसभा क्षेत्र प्रमुख संतोष सोनवणे, तालुका संघटक धीरज पाटील , संतोष माळी यांचेसह चर्चेसाठी कार्यालयात प्रकल्प बाधित बेरोजगार तरुण व
या प्रकल्पाचे मुख्य अभियंता विवेक रोकडे, स्थापत्यचे उपअभियंता तायडे , भेल कंपनीचे व्यवस्थापक एस. बी. जावळे, वेल्फेअर ऑफिसर एस. टी. वासुदेव यांचेसह विविध कंपन्यांचे अधिकारी उपस्थित होते.
यावेळी मुख्य अभियंता विवेक रोकडे यांनी येत्या आठ दिवसात रोजगार उपलब्ध करून देण्याचे आश्वासन दिले. यावेळी पाॅवरमॅक कंपनीचे डी. एन. सिंग, बी. जे. सी. एल. चे प्रमुख अधिकारी यांचेसह वेल्हाळे व वरणगाव तसेच परिसरातील बेरोजगार तरुण मोठ्या संख्येने उपस्थित होते.