लोकमत न्यूज नेटवर्क
जळगाव : तालुक्यातील शिरसोली प्र. बो. येथे सरपंच प्रदीप पाटील यांनी ग्रामसेवकांवर दबाव टाकून १४ व्या वित्त आयोगाचे प्लॅन मंजूर करून लाखो रुपयांचा भ्रष्टाचार करीत असल्याचा आरोप ग्रामपंचायतींच्या ९ सदस्यांनी केला आहे. १४ व्या वित्त आयोगाची संपूर्ण रक्कम सरपंच व ग्रामसेवकांकडून वसूल करावी, अशी मागणी या सदस्यांनी केली असून त्यांनी याबाबत जिल्हाधिकारी अभिजित राऊत यांना निवेदन दिले आहे.
१४ व्या वित्त आयोगाच्या कामाच्या निविदा काढण्यात आलेल्या नसून परस्पर ठेकेदारास काम देण्यात येत आहे. सरपंच पाटील व ग्रामसेवक शिरतूरे हे संगनमताने भ्रष्टाचार करीत असल्याचे निवेदनात नमूद करण्यात आले आहे. १३ मार्च रोजी झालेल्या बैठकीचे सर्व प्रोसिडिंग रद्द करण्याची मागणीही या सदस्यांनी केली आहे. आम्ही ९ सदस्यांनी ठरावास विरोध दर्शविला आहे. मात्र, ग्रामसेवक प्रोसेडिंग बूक घरी घेऊन गेले असून त्या ठिकाणी जागा कोऱ्या सोडण्यात आल्या आहेत. त्यामुळे यात भ्रष्टाचाराला वाव मिळतो. त्यामुळे १४ वित्त आयोगाचा काढलेला संपूर्ण पैसा हा सरपंच व ग्रामसेवकांक यांच्याकडून वसूल करण्यात यावा, अशी मागणी या निवेदनात करण्यात आली आहे. निवेदनावर ग्रा.पं.सदस्य समाधान जाधव, डिगंबर बारी, प्रवीण बारी, उषा पवार, आशाबाई बारी, श्रद्धा काटोले, रुपाली नेटके, फैजिया खाटीक, शीतल खलसे यांच्या स्वाक्षऱ्या आहेत. प्रदीप पाटील यांच्याकडे बहूमत नसल्याचेही निवेदनात नमूद करण्यात आले आहे.