चिंचोलीजवळील घटना : उपचारादरम्यान मृत्यू
फोटो..
जळगाव : शेताबाहेर दुचाकीसह उभ्या असलेल्या शिवाजी काळू पाटील (वय ६५, रा.धानवड, ता.जळगाव) या शेतकऱ्याला विरुद्ध दिशेने सुसाट आलेल्या डम्परने चिरडल्याची घटना बुधवारी दुपारी एक वाजता घडली. जखमी शेतकऱ्याला तत्काळ ग्रामस्थांनी जळगावी हलविले. उपचार सुरू असताना संध्याकाळीच त्यांची प्राणज्योत मालवली. दरम्यान, या घटनेनंतर चालकाने डम्पर सोडून पळ काढला.
सूत्रांनी दिलेल्या माहितीनुसार, तालुक्यातील धानवड येथील शिवाजी काळू पाटील हे कुटुंबीयांसह जळगाव शहरात मेहरुण परिसरात वास्तव्यास होते. बुधवारी ते धानवड येथे भावाकडे आले होते. त्यानंतर, नेहमीप्रमाणे ते शेतात गेले होते. दुपारच्या सुमारास शेताला लागून असलेल्या रस्त्यावर दुचाकीजवळ उभे असताना विरुद्ध दिशेने सुसाट येणाऱ्या डम्परने (क्र.जी.जे.१८अे.यु.७५६०) दुचाकीसह शेतकऱ्याला फरफटत शेतात नेले. यात शिवाजी पाटील गंभीर जखमी झाल्याने, तशाच अवस्थेत ट्रकवरील चालक आणि त्याचा साथीदार दोघांनी धूम ठोकली. जखमीला ग्रामस्थांनी उपचारार्थ जळगावात हलविले. उपचार सुरू असताना सायंकाळी त्यांचा मृत्यू झाला. एमआयडीसी पोलीस ठाण्यात ट्रकचालकाच्या विरुद्ध गुन्ह्याची नोंद करण्यात आली आहे.