जालना : तालुक्यात सध्या ग्रामपंचायत निवडणुकीचे वारे जोरात वाहत असून, पुरुषांपेक्षा महिला उमेदवारांची संख्या वरचढ आहे.
पुरुष उमेदवारांची संख्या ५६७ तर महिला उमेदवारांची संख्या तब्बल ८६४ एवढी आहे. सध्या अनेक ग्रामपंचायतींमध्ये महिलांना पुढे करत भविष्यात पतीराज तर निर्माण होणार नाही ना? असा प्रश्न मतदारांना पडला आहे.
जालना तालुक्यात होऊ घातलेल्या ८६ ग्रामपंचायतींच्या सार्वत्रिक निवडणुकांमध्ये श्रीकृष्णनगर ग्रामपंचायतीचे सर्व टप्पे रद्द झाले असून, आता प्रत्यक्षात ८५ ग्रामपंचायतींच्या निवडणुका होत आहेत. यातील चार ग्रामपंचायती बिनविरोध झाल्या आहेत. यात तांदूळवाडी खुर्द, तांदूळवाडी बुद्रुक, नसडगाव आणि घोडेगाव या गावांचा समावेश आहे. तालुक्यात निवडणूक होणाऱ्या प्रभागांची संख्या २७० असून, यासाठी ७३१ जागा आहेत. याच जागांसाठी तब्बल १ हजार ४३१ उमेदवार निवडणूक रिंगणात उतरले आहेत. पैकी ८६४ हा महिला उमेदवारांचा आकडा आहे. सरपंचपदाचे आरक्षण अद्याप जाहीर न झाल्याने पॅनल प्रमुखांसाठी बुचकाळ्यात टाकणारा हा निर्णय आहे. असे असले तरी गावातील प्रभागांमधील सदस्यांची संख्या लक्षात घेऊन सरपंचपद कशा पद्धतीने आरक्षित राहील, याचे अंदाज बांधून पॅनलप्रमुख भूमिका बजावत असल्याचे पहावयास मिळत आहे. तालुक्यातील ८५ ग्रामपंचायतींच्या निवडणुकांमध्ये तब्बल ३१४ जागा महिलांसाठी राखीव आहेत. परंतु, निवडणुकीच्या रिंगणात प्रत्यक्ष ८६४ महिला आहेत. याची टक्केवारी ६० टक्क्यांवर जात आहे. तर निवडणुकीच्या रिंगणात पुरुष उमेदवारांची संख्या ५६७ (४० टक्क्यांच्या जवळपास) आहे.
निवडणुकीच्या अनुषंगाने तहसील प्रशासनाकडून सर्व तयारी करण्यात आली आहे. तहसीलदार श्रीकांत भुजबळ यांच्या मार्गदर्शनाखाली परिविक्षाधीन उपजिल्हाधिकारी अविनाश कोरडे, परिविक्षाधीन तहसीलदार शीतल बंडगर, तहसीलदार तुषार निकम, नायब तहसीलदार निवडणूक दिलीप सोनवणे, मनुष्यबळ व्यवस्थापनाचे जी. एल. सर्वे, अनिल पाटील, संदीप गाढवे, विश्वास भोरे, संदीप डोंगरे, पी. एस. रायमल, कल्याण गव्हाणे आदी काम करीत आहेत.
या ग्रामपंचायतींच्या निवडणुका होणार
जालना तालुक्यातील सिरसवाडी, रोहनवाडी, हिस्वन बुद्रुक, पिरकल्याण, नसडगाव, सावंगी तलाव, पळसखेडा, काकडा, जळगाव, खनेपुरी, जामवाडी, बेथलम, वडीवाडी, तांदुळवाडी बुद्रुक, निरखेडा, विरेगाव, तांदुळवाडी खुर्द, पाथ्रुड, घेटोळी, सोनदेव धारा, वानडगाव, वडगाव पत्रा- तांडा, इंदेवाडी, शिवणी, लोंढेवाडी, इस्लामवाडी, हिवर्डी, बोरगाव, बाजिउम्रद, शंभू सावरगाव, वरखेड- नेर, पोखरी शिंगाडे, भिलपुरी- खुर्द, मानेगाव, देवमुर्ती, रेवगाव, बापकळ, उटवद, थेरगाव, घोडेगाव, मौजपुरी, चितळी- पुतळी, माळशेंद्रा, ममदाबाद, गोलापांगरी, बठाण- बुद्रुक, उखळी- शिवनगर, खरपुडी- गोकुळ नगर, दहीफळ, वखारी, कोळवाडी- दरेगाव- नेर, कचरेवाडी, भाटेपुरी- हिवरा- रोषणगाव, हातवन- दुधना काळेगाव हस्ते, पिंपळगाव, धानोरा, धांडेगाव, वंजार उमरद, गोंदेगाव, गुंडेवाडी, कुंभेफळ, निधोना, श्रीकृष्णनगर, पारेगाव, घाणेवाडी, सारवाडी, हिस्वन खुर्द, पुणेगाव, निपाणी, पोखरी, कडवंची, दरेगाव, धारकल्याण, पाचनवडगाव, डांबरी, सोमनाथ, पोकळवडगाव, सिंधीकाळेगाव, माळेगाव खुर्द, कारला, सेवली, वझर, अंतरवाला, सामनगाव, राठोडनगर या गामपंचायतींच्या निवडणुका होणार आहेत.