टेंभुर्णी : शाळेतील मुलं देशाचे भवितव्य घडविणारी असतात, ही बाब लक्षात घेऊन डोलखेडा खुर्द (ता. जाफराबाद) येथील ग्रामस्थांनी लोकवर्गणीतून शाळेसाठी जमीन घेण्याचा निर्णय घेतला आहे. जुन्या शाळेची झालेली दुरवस्था आणि अपुरी जागा, यामुळे रविवारी शाळेत बैठक घेण्यात आली. या बैठकीत शाळेसाठी लागणारी एक एकर जमीन घेण्यासाठी लोकवर्गणी करण्याचा एकमुखी निर्णय घेण्यात आला.
जाफराबाद तालुक्यातील डोलखेडा खुर्द येथील जिल्हा परिषद शाळेच्या विकासासाठी ग्रामस्थ सरसावले आहेत. गावातील जिल्हा परिषद प्राथमिक शाळा आहे. सद्यस्थितीत शाळेची इमारत अतिशय जीर्ण झाली आहे. ही शाळा गावाच्या मध्यभागी आल्याने अनेक समस्यांंच्या निर्माण झाल्या आहेत. शाळेच्या समोरच गावचा पार असल्याने नेहमीच येथे वर्दळ असते. त्यामुळे प्रयत्न करूनही येथे शैक्षणिक वातावरण तयार होण्यास अडथळे येतात. यासाठी गावातून शाळा स्थलांतर करण्याचा विचार पुढे आला. या पार्श्वभूमीवर रविवारी शाळेत पालक मेळावा झाला. यावेळी ग्रामस्थांनी लोकवर्गणीतून शाळेसाठी एक एकर जागा विकत घेण्याचा एकमुखी निर्णय घेण्यात आला. या पालक मेळाव्यात गटसाधन केंद्राचे साधन व्यक्ती नारायण पिंपळे, शिक्षक नसीम शेख यांनी ग्रामस्थांचे उद्बोधन केले. यावेळी गावचे आजी-माजी सरपंच, उपसरपंच, शाळा व्यवस्थापन समिती अध्यक्ष, उपाध्यक्ष, ग्रामपंचायत व शाळा व्यवस्थापन समिती पदाधिकारी, शाळेचे मुख्याध्यापक, शिक्षकांसह पालकांची उपस्थिती होती.
निधी संकलनास प्रारंभ
शाळेला लागणाऱ्या जमिनीसाठी निधी संकलन करण्याचा निर्णय घेण्यात आला. निर्णय घेऊन न थांबता लगेचच निधीचे संकलनही सुरू करण्यात आले आहे. यासाठी विविध ठिकाणी शासकीय सेवेत असलेल्या गावच्या अधिकारी, कर्मचारी यांचे सहकार्य घेतले जाणार असून, गावातील प्रत्येक उंबरठ्याकडून लोकवर्गणी घेतली जाणार आहे.