भोकरदन : तालुक्यातील तळेगाववाडी येथील पाझर तलावात आंघोळीसाठी गेलेल्या पाच मुलींचा बुडून मृत्यू झाल्याची धक्कादायक घटना मंगळवारी सायंकाळी उघडकीस आली आहे. मृत्युमुखी पडलेल्या पाचही मुली आपसात नातेवाईक असून ८ ते १२ वयोगटातील असल्याची प्राथमिक माहिती आहे.
तळेगाववाडी येथील पाझर तलावाच्याजवळ काही नागरिकांची वस्ती आहे. आज दुपारी येथील सहा मुली पाझर तलावात कपडे धुण्यासाठी गेल्या होत्या. कपडे धुतल्यानंतर सहाही मुली वस्तीवर येऊन अंघोळीसाठी परत तलावावर गेल्या. पाण्यात उतरल्यानंतर त्यातील एक मुलगी तलावातील खड्ड्यात बुडाली. तिला वाचविण्यासाठी दुसरीने प्रयत्न केला असता ती सुद्धा बुडाली. दोघी बुडत असल्याचे दिसताच इतर तिघींनी त्यांना वाचविण्याचा प्रयत्न केला. परंतु, पाचही मुली त्यात बुडाल्या. यावेळी सहाव्या मुलीने लागलीच वस्तीवर धाव घेत तेथील नागरिकांना सर्व हकीकत सांगितली. नागरिकांनी लागलीच तलावाकडे धाव घेतली.
पाचही मुलींना अत्यवस्थ अवस्थेत तलावाच्या बाहेर काढण्यात आले. त्यांना उपचारासाठी तत्काळ फुलंब्री येथील रुग्णालयाकडे रवाना करण्यात आले. मात्र, वाटेतच पाचही मुलींचा मृत्यू झाल्याचे लक्षात आले. या घटनेने तळेगाव वाडी परिसरात हळहळ व्यक्त होत आहे.
अर्शान लतीफ पठाण ( १२ ), अल्फिया गौफखा पठाण ( १० ), शबाना असलम पठाण ( ८ ), सादिया असलं पठाण (१० ), नाझिया नवाज पठाण ( ८ ) अशी मृत मुलींची नावे आहेत. तर नाझिया असेफ पठाण ( ८ ) ही मुलगी बचावली आहे.