केदारखेडा : थकीत वीज बिलाच्या पोटी महावितरण कृषीपंपांचा वीजपुरवठा खंडित करण्यात आला आहे. पाण्याअभावी रब्बीतील पिकांचे होणारे नुकसान पाहून शेतकरी पुत्रांनी सोमवारी महावितरणच्या भोकरदन येथील उपविभागीय कार्यालयासमोर ठिय्या आंदोलन केले. अधिकाऱ्यांवर प्रश्नांचा भडिमार करीत दोन दिवसांत वीजपुरवठा पूर्ववत न झाल्यास तीव्र आंदोलन करू, असा इशारा देण्यात आला आहे.
आंदोलकांनी उपकार्यकारी अभियंता दीपक तुरे यांना मागण्यांचे निवेदन दिले आहे. कृषीपंपांचा वीजपुरवठा खंडित केल्यामुळे पिकांना पाणी देता येत नाही. पाण्याअभावी पिके सुकू लागली आहेत. याचा फटका रब्बीतील गहू, ज्वारी, बाजरी, हरभरा या पिकांना बसत आहे. तसेच जनावरांना पाणी पाजण्यासाठी पशुपालकांची गैरसोय होत आहे. त्यामुळे खंडित केलेला विद्युत पुरवठा दोन दिवसांत सुरळीत करण्याची मागणी करण्यात आली. मागणी मान्य न झाल्यास १८ फेब्रुवारी रोजी महावितरण कार्यालयात रुमणे आंदोलन छेडण्याचा इशारा देण्यात आला आहे. निवेदनावर नारायण लोखंडे, विकास जाधव, सिरसगाव मंडपचे सरपंच सूरज सहाणे, बरंजळा साबळेचे सरपंच नारायण साबळे, प्रदीप शिंदे, संदीप भोकरे, अजहर शेख, रवींद्र मोरे, अनिल साबळे, आप्पासाहेब जाधव, अजिनाथ सहाणे, प्रदीप लोखंडे, तुळशीराम साबळे, जगदीश सहाणे, आप्पासाहेब सहाणे, बाबासाहेब शिरसाट, गणेश लोखंडे, आदींच्या सह्या आहेत.
घोषणांनी दणाणला परिसर
यावेळी आंदोलकांनी दिवसा वीज द्या, आमचं जगणं मान्य करा, जय जवान-जय किसान, खंडित केलेला वीजपुरवठा सुरळीत करा, अशा घोषणा दिल्या. युवकांनी दिलेल्या गगनभेदी घोषणांनी परिसर दणाणून गेला होता.
कोट
निवडणूक आली की सर्वच राजकीय पक्षांकडून शेतकऱ्यांना वीज बिल माफीची आश्वासने दिली जातात. त्यामुळे शेतकरी संभ्रमात सापडतो. त्यात कधी अतिवृष्टीमुळे, तर कधी दुष्काळी परिस्थितीमुळे शेतकरी देशोधडीला लागत आहेत. त्यात कृषिपंपांचा वीजपुरवठा खंडित झाल्याने एक ना अनेक समस्या निर्माण झाल्या आहेत. त्यामुळे तत्काळ वीजपुरवठा सुरू करावा, अन्यथा तीव्र आंदोलन केले जाईल, असा इशारा नारायण लोखंडे यांनी यावेळी दिला.
फोटो