शिवणगाव येथे सकल मराठा समाजाची बैठक
घनसावंगी : साष्टपिंपळगाव येथे सुरू असलेल्या मराठा आंदोलनाच्या पार्श्वभूमीवर शिवणगाव येथे सकल मराठा समाजाची बैठक घेण्यात आली. यावेळी अखिल भारतीय मराठा महासंघाचे युवक प्रदेशाध्यक्ष गोपाल राजुरकर, मनोज जरांगे, शिवशाहीर अरविंद घोगरे यांच्यासह समाज बांधवांची उपस्थिती होती.
भाले विद्यालयात गुणवंतांचा गौरव
अंबड : शहरातील दत्ताजी भाले प्राथमिक विद्यालयातील गुणवंत विद्यार्थ्यांचा मान्यवरांच्या हस्ते गौरव करण्यात आला. यावेळी पोलीस निरीक्षक अनिरूद्ध नांदेडकर, डॉ. राजेंद्र भाला, विजयकुमार सोमाणी यांची उपस्थिती होती. उपस्थितांनी विद्यार्थ्यांना मार्गदर्शन केले. कार्यक्रमासाठी शिक्षक, शिक्षकेतर कर्मचाऱ्यांनी परिश्रम घेतले.
मानेगाव तांडा येथे एकाची आत्महत्या
जालना : तालुक्यातील मानेगाव तांडा येथील मधुकर सोपान विटकर (४०) यांनी शनिवारी राहत्या घरी गळफास घेऊन आत्महत्या केली. या प्रकरणी लक्ष्मण मोहिते यांनी दिलेल्या माहितीवरून मौजपुरी पोलीस ठाण्यात आकस्मिक मृत्यूची नोंद करण्यात आली आहे. या प्रकरणाचा तपास जमादार पांडुरंग चव्हाण हे करीत आहेत.
अवैध प्रवासी वाहतूक; कारवाईची मागणी
मंठा : शहरासह ग्रामीण भागात अवैध प्रवासी वाहतूक मोठ्या प्रमाणात वाढली आहे. अनेक वाहन चालक क्षमतेपेक्षा अधिक प्रवाशांची वाहतूक करीत असून, वाहतूक नियमही धाब्यावर बसवित आहेत. वाढलेले रस्ता अपघात पाहता संबंधित प्रशासनाने अवैध प्रवासी वाहतूक करणाऱ्यांवर कारवाई करावी, अशी मागणी होत आहे.