अमेरिकेवर आखाती देश प्रचंड नाराज! इराणवर हल्ले करण्यापूर्वी विश्वासात घेतले नाही, वाऱ्यावर सोडले

Iran US Israel War News इराण-इस्रायल युद्धाचा भडका! अमेरिकेच्या भूमिकेमुळे आखाती मित्रराष्ट्र नाराज. डोनाल्ड ट्रम्प यांचा इराणला शरण येण्याचा इशारा, तर लेबनॉनमध्ये इस्रायलची भीषण बॉम्बफेक. पाहा सविस्तर अपडेट्स.

मध्यपूर्वेतील परिस्थिती अत्यंत स्फोटक बनली असून, अमेरिकेच्या युद्धनीतीमुळे आता तिचे स्वतःचे आखाती मित्रराष्ट्र नाराज झाले आहेत. इराणवर हल्ले करण्यापूर्वी अमेरिकेने विश्वासात घेतले नाही आणि प्रतिहल्ल्यावेळी वाऱ्यावर सोडले, असा गंभीर आरोप या देशांनी केला आहे. दुसरीकडे, अमेरिकेचे राष्ट्राध्यक्ष डोनाल्ड ट्रम्प यांनी इराणला "बिनशर्त शरण या, अन्यथा युद्धाला सामोरे जा" असा स्पष्ट इशारा दिला आहे.

मित्रराष्ट्रांचा संताप आणि तक्रारी:पर्शियाच्या आखातातील अमेरिकेच्या मित्रराष्ट्रांनी ट्रम्प प्रशासनावर अनेक गंभीर आक्षेप घेतले आहेत. इस्रायलसोबत मिळून केलेल्या हल्ल्याची पूर्वसूचना मित्रराष्ट्रांना देण्यात आली नव्हती. अमेरिकन सैन्य केवळ स्वतःच्या आणि इस्रायलच्या सैनिकांच्या सुरक्षेवर लक्ष केंद्रित करत असून आम्हाला असुरक्षित सोडले आहे, असा आरोप एका अधिकाऱ्याने केला. इराणची क्षेपणास्त्रे रोखणाऱ्या 'इंटरसेप्टर्स'चा साठा वेगाने संपत असल्याने या देशांसमोर सुरक्षेचे मोठे संकट उभे राहिले आहे.

लेबनॉनमध्ये रक्ताचा सडाइस्रायलने दक्षिण लेबनॉनमधील स्रिफा, सिदोन आणि मजदल सेलम यांसारख्या शहरांवर तुफान बॉम्बफेक केली आहे. सिदोनमधील हल्ल्यात ५ जणांचा मृत्यू झाला असून, या आठवड्यात मृतांची संख्या १२३ वर पोहोचली आहे. हिजबुल्लाने आता इस्रायली नागरिकांना सीमावर्ती भाग रिकामी करण्याचा इशारा दिला असून मोठ्या भूदलाच्या कारवाईची शक्यता वाढली आहे.

इराणचे 'ड्रोन वाहक' जहाज पेटवलेअमेरिकेने इराणच्या ‘आयआरआयएस शाहिद बाघेरी’ या अद्ययावत ड्रोन वाहक जहाजावर हल्ला करून त्याला आग लावली आहे. हे जहाज इंधन न भरता २२ हजार नॉटिकल मैल प्रवास करण्यास सक्षम होते. तसेच, इराणमधील केरमानशाह जवळील अनेक क्षेपणास्त्र तळ उद्ध्वस्त केल्याचा दावा इस्रायलने केला आहे.

दोन जपानी नागरिक ताब्यातइराणमध्ये तणाव वाढत असतानाच एनएचके (NHK) या वृत्तसंस्थेचे तेहरान ब्युरो प्रमुख शिनोसुके कावाशिमा यांच्यासह दोन जपानी नागरिकांना इराणने ताब्यात घेतले आहे.