"मी ब्लँक चेक देतो, फोटोही छापायला तयार..."; महिला आरक्षणावर PM मोदींची विरोधकांना कोणती ऑफर?

कुठल्याही भ्रमात राहू नका. आपण देशातील नारी शक्तीला काही तरी देतोय हा भ्रमही राहू नये. हा त्यांचा अधिकार असून आपण इतकी दशके त्यांना रोखले असं महिला आरक्षणावर मोदींनी सांगितले.

नवी दिल्ली - पंतप्रधान नरेंद्र मोदी यांनी महिला आरक्षणावर सर्व विरोधी पक्षांना सोबत येण्याचं आवाहन केले आहे. महिला आरक्षण विधेयकाला राजकीय तराजूत मापू नका. अर्ध्या लोकसंख्येला आपण रोखू शकत नाही. मला याचे राजकीय श्रेय घ्यायचे नाही. त्यामुळे सर्वांनी मिळून हे विधेयक पारित करावे. तुम्हाला हवे तर क्रेडिट तुम्हीच घ्या आणि हे विधेयक मंजूर करा असं पंतप्रधान नरेंद्र मोदी यांनी लोकसभेत म्हणताना विरोधकांना ऑफरही दिली.

पंतप्रधान नरेंद्र मोदी म्हणाले की, मी तुम्हाला ब्लँक चेक देत आहे. जर तुम्हाला क्रेडिट घ्यायचं असेल तर आम्ही सरकारी पैशातून तुमच्या सगळ्यांचे फोटो छापण्यास तयार आहोत. तुम्ही ज्या कुणाचे फोटो द्याल त्या सगळ्यांचा फोटो सरकारी खर्चातून प्रसिद्ध करू परंतु हे विधेयक संसदेत पारित व्हायला द्यावे असं त्यांनी लोकसभेत विरोधकांना सांगितले.

तसेच कुठल्याही भ्रमात राहू नका. आपण देशातील नारी शक्तीला काही तरी देतोय हा भ्रमही राहू नये. हा त्यांचा अधिकार असून आपण इतकी दशके त्यांना रोखले. आज त्याची भरपाई करण्याची आणि त्या गुन्ह्यापासून सुटका करून घेण्याची संधी आहे. कशाप्रकारे चलाखीचा वापर केला गेला आहे हे आपल्या सर्वांना माहीत आहे. आपण त्याच्या बाजूने आहोत पण प्रत्येक वेळी काहीतरी तांत्रिक कारण देऊन ते थांबवण्यात आले. पण आता तुम्ही देशातील महिलांना ते समजावून सांगू शकणार नाही असंही मोदींनी म्हटलं. 

दरम्यान, सभागृहातील संख्याबळाचा खेळ नंतर उघडकीस येईल. आम्ही त्याला ३ दशके जाळ्यात अडकवून ठेवले, जे काही करायचे होते ते केले. आता जाऊ द्या भाऊ. येथील काही लोकांना वाटतं यात मोदींचा काही राजकीय स्वार्थ आहे. पण मला यात कोणताही राजकीय फायदा नाही, पण जर तुम्ही याला विरोध केला तर आम्हाला त्याचा फायदा नक्कीच होईल असा टोला पंतप्रधान नरेंद्र मोदी यांनी विरोधकांना लगावला. 

सीमांकनावर भेदभाव नाही, ही माझी गॅरंटी

दरम्यान, सीमांकनावरून कुठल्याही राज्यासोबत भेदभाव होणार नाही असं पंतप्रधान सांगत होते, तेव्हा एका महिला खासदाराने मध्येच अडवून याची गॅरंटी काय असा प्रश्न केला.त्यावर मोदींनी ही माझी गॅरंटी आहे. जर तुम्ही याला वचन म्हणत असाल तर मी वचन देतो. तामिळ भाषेत आश्वासनाला जर एखादा शब्द असेल तर तोही घेतो. सीमांकनाची प्रक्रिया कुठलाही भेदभाव करणार नाही असं आश्वासन पंतप्रधान मोदींनी लोकसभेत दिले.