भयानक अन् भयावह! इस्रायलने इराणवर ५,००० बॉम्ब, क्षेपणास्त्रे डागली; तरीही इराणने हार मानली नाहीय...

अमेरिका-इस्रायलच्या हल्ल्यात इराणमध्ये आतापर्यंत १०४५ लोकांचा मृत्यू झाला आहे. मीनाबमधील गर्ल्स स्कूलवर झालेल्या हल्ल्याने जग हादरले. इराण-इस्रायल युद्धाचे ताजे अपडेट्स वाचा.

तेल अवीव/तेहरान: मध्य-पूर्वेतील युद्ध आता निर्णायक टप्प्यावर पोहोचले आहे. इस्रायली लष्कराने अधिकृतपणे जाहीर केले आहे की, त्यांनी इराणमधील विविध लक्ष्यांवर आतापर्यंत तब्बल ५,००० हून अधिक स्फोटके आणि क्षेपणास्त्रे डागली आहेत. या भीषण हल्ल्यांमुळे इराणची संरक्षण यंत्रणा आणि लष्करी पायाभूत सुविधांचे मोठे नुकसान झाल्याचे सांगण्यात येत आहे.

इस्रायलने इराणच्या लष्करी तळांना, क्षेपणास्त्र केंद्रांना आणि अण्वस्त्र निर्मितीशी संबंधित असल्याच्या संशयास्पद ठिकाणांना लक्ष्य केले आहे. ५,००० हून अधिक युद्धसामग्री वापरून इस्रायलने इराणच्या 'एअर डिफेन्स' यंत्रणेला खिळखिळे केल्याचा दावा केला आहे.

नुकसानीची व्याप्ती
इराणमधील अनेक शहरांच्या बाहेरील भागांत भीषण स्फोटांचे आवाज ऐकू आले असून, मोठ्या प्रमाणावर जीवित आणि वित्तहानी झाल्याची भीती व्यक्त केली जात आहे. इस्रायलने हे हल्ले इतक्या वेगाने केले आहेत की इराणला प्रत्युत्तर देण्यासाठी पुरेसा वेळ मिळू शकला नाही, असे लष्करी विश्लेषकांचे म्हणणे आहे.

इराणचाही पलटवार
इराणने देखील या हल्ल्यांचा निषेध केला असून "इस्रायलला याचे गंभीर परिणाम भोगावे लागतील," असा इशारा दिला आहे. इराणने 'होर्मुझची सामुद्रधुनी' बंद करण्यासारखे पाऊल आधीच उचलल्याने जागतिक स्तरावर चिंतेचे वातावरण आहे. २८ फेब्रुवारीपासून सुरू झालेल्या संयुक्त हवाई हल्ल्यांमध्ये आतापर्यंत किमान १०४५ लोकांचा मृत्यू झाला आहे. इराण रेड क्रेसेंटने दिलेल्या माहितीनुसार, या युद्धाचा फटका १३० हून अधिक शहरे आणि निवासी भागांना बसला असून संपूर्ण इराणमध्ये आक्रोशाचे वातावरण आहे. इस्रायलने इराणची लष्करी शक्ती खिळखिळी केल्याचा दावा केला असला, तरी इराणने अनेक ठिकाणी जबरदस्त प्रत्युत्तर दिले आहे. इराणच्या या पलटवारामुळे संपूर्ण आखाती क्षेत्रात संघर्षाची ठिणगी अधिक वेगाने पसरण्याची भीती निर्माण झाली आहे.