सुंदर ‘बायको’ आणि १ अब्ज डॉलर द्या, नाहीतर..; जगात एकीकडे युद्ध अन् दुसरीकडे भलतेच उद्योग

कैनेरुगाबानं अलीकडेच सोशल मीडियावर अनेक वादग्रस्त पोस्ट केल्या. त्यानं विरोधी नेते बॉबी वाइन यांना शिरच्छेदाची धमकी दिली, ज्यावर मोठा वाद झाला. नंतर त्यानं तो विनोद असल्याचं सांगत माफी मागितली.

जगात सध्या सगळीकडे युद्धाच्या बातम्या आणि त्याविषयीच्या चर्चा सुरू असताना युगांडामध्ये (आणि तुर्कीत) वेगळंच काही घडत आहे. त्यामुळे अख्खं जग चक्रावलं आहे आणि अनेकांना धक्का बसला आहे. युगांडाचा आर्मी चीफ असलेला राष्ट्राध्यक्षांचा मुलगा मुहूजी कैनेरुगाबानं तुर्कीला काय धमकी द्यावी आणि त्यांच्याकडे काय मागणी करावी? - त्यानं तुर्कीला धमकी दिली आहे की, त्यांनी तातडीनं आम्हाला एक अब्ज डॉलर (९००० कोटी रुपये) आणि देशातील ‘सगळ्यात सुंदर महिला’ मला पत्नी म्हणून द्यावी. ही मागणी पूर्ण नाही झाली तर तुर्कीसोबतचे कूटनीतिक संबंध संपवले जातील आणि तुर्किश एअरलाइन्सवर बंदी घातली जाईल. 

कैनेरुगाबानं ‘एक्स’वर लिहिलं की जर तुर्कीनं आमच्या समस्या सोडवल्या नाहीत तर महिनाभरात त्यांच्याबरोबरचे संबंध तोडले जातील आणि त्यांनी पैसे दिले नाहीत, तर आम्ही त्यांचं दूतावास बंद करू! त्यानं युगांडातील लोकांना तुर्कीचा प्रवास टाळण्याचाही सल्ला दिला आहे आणि इस्रायलच्या समर्थनार्थ एक लाख सैनिक पाठवण्याची ऑफर दिली आहे. कैनेरुगाबानं पोस्टमध्ये तुर्कीवर आरोप केला की त्यांनी सोमालियात इन्फ्रास्ट्रक्चर, पोर्ट आणि एअरपोर्ट प्रोजेक्ट्समधून फायदा घेतला, तर युगांडानं अल-शबाबसारख्या दहशतवादी संघटनांविरुद्ध लढण्याचं ओझं उचललं. याच आधारावर त्यानं एक अब्ज डॉलरची मागणी केली आहे. कैनेरुगाबानं अलीकडेच सोशल मीडियावर अनेक वादग्रस्त पोस्ट केल्या. त्यानं विरोधी नेते बॉबी वाइन यांना शिरच्छेदाची धमकी दिली, ज्यावर मोठा वाद झाला. नंतर त्यानं तो विनोद असल्याचं सांगत माफी मागितली.

दरम्यान, काही दिवसांपूर्वीच त्यानं आपलं ‘एक्स’ अकाउंट डिलीट केलं होतं. त्यानंतर ‘I am back’ असं लिहून परत येण्याची घोषणा केली आणि जग हादरवून टाकू, असा इशाराही दिला होता. परत आल्यानंतर त्यानं सुरक्षा यंत्रणांना आदेश दिले की सैन्यासारखा गणवेश घातलेला कोणीही दिसला तर त्याला ताबडतोब अटक करा.  ५० वर्षांचा कैनेरुगाबा हा त्याचे वडील आणि राष्ट्राध्यक्ष योवेरी मुसेवेनी यांचा संभाव्य उत्तराधिकारी मानला जातो. मात्र, मुसेवेनी यांनी याला नकार दिला आहे. मात्र, राजकीय विश्लेषकांचं मत आहे की तो हळूहळू राजकारणात स्वतःची पकड मजबूत करत आहे आणि भविष्यात राष्ट्राध्यक्षपदासाठीही दावा करू शकतो. युगांडात मुसेवेनी १९८६ पासून सत्तेत आहेत. कैनेरुगाबाची ही पहिलीच वेळ नाही की त्यानं अशा विचित्र मागण्या आणि धमक्या दिल्या आहेत. २०२२मध्ये त्यानं इटलीच्या पंतप्रधान जॉर्जिया मेलोनी यांच्याशी लग्नाच्या बदल्यात १०० गायी देण्याची ऑफर दिली होती! त्यावेळी त्यानं म्हटलं होतं की, इटलीनं प्रस्ताव नाकारला तर रोमवर ताबा घ्यावा लागेल. या विधानानंतर त्याचे वडील राष्ट्राध्यक्ष मुसेवेनींना माफी मागावी लागली होती.

२०२२मध्ये त्यानं केनियावर हल्ला करण्याची धमकीही दिली होती. त्यानं म्हटलं होतं की, नैरोबीवर ताबा मिळवायला दोन आठवडेही लागणार नाहीत. त्यानंतर त्याला तात्पुरतं पदावरून हटवलं गेलं आणि सरकारला माफी मागावी लागली. याआधी त्यानं रशिया-युक्रेन युद्धात व्लादिमीर पुतिन यांना समर्थन दिलं होतं आणि केनियाच्या तुर्काना समुदायाबद्दलही वादग्रस्त वक्तव्य केलं होतं.