चीनचा दुटप्पीपणा

चीनने ‘दक्षिण चीन समुद्र’ हा भाग वादग्रस्त असल्याचे सांगत भारताच्या तेथील तेल उत्खननाला विरोध दर्शविला

बीजिंग : चीनने ‘दक्षिण चीन समुद्र’ हा भाग वादग्रस्त असल्याचे सांगत भारताच्या तेथील तेल उत्खननाला विरोध दर्शविला मात्र पाकव्याप्त काश्मिरातील आपल्या ४६ अब्ज डॉलरच्या आर्थिक कॉरिडॉर योजनेस उपजीविकेशी संबंधित योजना संबोधत तिचे समर्थन केले. भारतीय पत्रकारांनी वरिष्ठ चीनी अधिकाऱ्याशी केलेल्या वार्तालापात चीनचा हा दुटप्पीपणा समोर आला. भारत व चीन हे दोघेही दक्षिण चीन सागरातील मुक्त वाहतुकीचे समर्थन करतात. याबाबत कोणतेही मतभेद नाहीत, असे चिनी परराष्ट्र मंत्रालयातील आशियाई व्यवहार विभागाचे उपसंचालक हुआंग शिलियान यांनी भारतीय पत्रकारांना सांगितले. ते पुढे म्हणाले की, चीनची कंपनी भारताच्या वादग्रस्त क्षेत्रात काम करण्यास गेल्यास भारत त्याविरुद्ध प्रतिक्रिया व्यक्त करेल. त्याचप्रमाणे भारतीय कंपनी ओएनजीसीने व्हिएतनाम दावा करत असलेल्या दक्षिण चीन सागरात उत्खनन करण्यास चीनचा आक्षेप आहे. ओएनजीसीला व्हिएतनामची मुभा मिळाली. मात्र, चीनच्या आक्षेपामुळे उत्खनन रखडले आहे. ही योजना व्यावसायिक असून तिचे राजकारण करण्याची गरज नाही, असे भारताचे म्हणणे आहे. (वृत्तसंस्था)दक्षिण चीन सागरात भारताने उत्खनन करण्यास तुमचा विरोध तुम्ही सैद्धांतिक मानता. मग तोच सिद्धांत तुमच्या पाकव्याप्त काश्मिरातील कॉरिडॉरसाठी लागू होत नाही का, असा सवाल केला असता ते म्हणाले की, ही कॉरिडॉर योजना राजकीय नसून लोकांच्या उपजीविकेसाठी आहे. चीनने संपूर्ण दक्षिण चीन सागरावर मालकीचा दावा केला असून चीनच्या या दाव्याला व्हिएतनाम, फिलिपाईन्स, मलेशिया, ब्रुनेई आणि तैवानने आक्षेप घेतलेला आहे.